नेवा: अनलाइन न्युज | २०७६ जेठ २१, मंगलबार १४:१५:३३

इंग्ल्याण्डय् जुयाच्वंगु छगू दिवसीय विश्वकप क्रिकेट कासा अन्तर्गत सोमवा ट्रेन्टब्रिज मैदानय् जूगु कासाय् इंग्ल्याण्डविरुद्ध पाकिस्तान १४ रनं त्याःगु दु ।

इंग्ल्याण्डया कप्तान इओन मोर्गनं टस त्याकाः न्हापां क्षेत्ररक्षण ल्यःगु खः । पाकिस्तानं न्हापां ब्याटिङ यासें निर्धारित ५० ओभरय् ३४८ रन दयेकूगु खः ।

त्याकेगु नितिं ३४९ रनया तःधंगु लक्ष्य कयाः मैदानय् क्वाहाँ वःगु इंग्ल्याण्डया नितिं जो रुट व जस बटलर निम्हेस्यां व्यक्तिगत १०७ व १०३ रन दयेकूसां नं त्याकेमफुत ।

इंग्ल्याण्डया टिमय् तीव्र गतिया बलर मार्क उडयात दुथ्याकूगु खः । इंग्ल्याण्डं न्हापां उलेज्या कासाय् दक्षिण अफ्रिकायात १०४ रनं बुकूगु खःसा पाकिस्तान वेस्ट इन्डिजलिसे ७ विकेटं बूगु खः ।

इंग्ल्याण्डया टिमय् जेसन रोय, जोन्नी बेयरस्ट, जो रुट, इओन मोर्गन –कप्तान), जस बटलर, बेन स्टोक, मोइन अली, क्रिस वोक्स, आदिल रसिद, जोफ्रा आर्चर व मार्क उड दूगु खःसा पाकिस्तानी टिमय् फखार जमान, इमाम–उल–हकm बाबर आजम, मोहम्मद हाफीज, सरफराज अहमद, शोएब मलिक, आसिफ अली, शादाब खान, हसन अली, वाहाब रियाज व मोहम्मद आमिर दूगु खः ।

मंगलवाःया कासा अफगानिस्तान व श्रीलंका दथुइ जूगु खः ।

Categorized in कासा