ad 2076 5 18

विराटनगर बजारय् लः हे लः, रंगशाला हे डुबानय्, कासा लिछ्यात

नेवा: अनलाइन न्युज | २०७६ आषाढ २६, बिहिबार १४:२२:०२

स्वन्हु न्ह्यःनिसें मद्दिक्क वःगु वाया हुनिं विराटनगर लः हे लखं जाःगु दु । विराटनगर बजार क्षेत्रय् वःगु लः निकास जुइगु धः दुनावंगु हुनिं बजार क्षेत्र लः हे लखं जाःगु खः ।

वःगु वा निकास मजूबलय् विराटनारया कोशी अञ्चल अस्पतालया प्रवेशद्वार जलमग्न जूगु खः । लःया हे हुनिं विराटनगरय् जुइगु धाःगु मुख्यमन्त्रीकप नं धरानय् सारेयाःगु दु । मुख्यमन्त्री कप थौं बिहिवाःनिसें न्ह्याइगु धलः दूगु खः । तर, उलेज्या कासा जुइगु विराटनगर शहीद रंगशाला लखं जायेधुंकाः कासा धरानय् लिछ्याःगु खः ।

वा वःगु हुनिं विराटनगरया मू बजाः क्षेत्र लखं जाःगु दु । विराटनगरय् क्षेत्रीय सहरी विकास परियोजना अन्तर्गत धः व सतक निर्माणया ज्या जुयाच्वंगु दु । परियोजनाया ज्या संचालन याःबलय् निकास धः क्लियर मजूबलय् बजार क्षेत्र जलमग्न जूगु खः ।

विराटनगर महानगरपालिकाया मेयर भीम पराजुलीं विराटनगर दरैया क्षेत्र अप्वः डुबानय् लाःगु धाःगु दु । मेयर पराजुलीया कथं विराटनगरया उत्तरी क्षेत्रय् सिबें दक्षिणी क्षेत्र अप्वः डुबानय् लाःगु दु ।

विराटनगरया बजार क्षेत्र निर्माणया चरणय् दूगु हुनिं वा वःबलय् डुबानय् लाःगु मेयर पराजुलीं धाःगु दु । लः ब्लकेज जुइधुंकाः बजार क्षेत्रय् स्काभेटर छ्यलाः ब्लकेज चायेकेगु ज्या जुयाच्वंगु मेयर पराजुलीया धापू दु । महानगरपालिका निर्माणया चरणय् दूगु हुनिं जनतां दुःख फयेमाःगु धासें मेयरं सतर्क जुइत आग्रह याःगु दु ।

कोशी अञ्चल अस्पताल डुबानय् लाःगुया हुनि निकास धः मदूगु धासें मेयरं अस्पतालया लः निकास यायेत ब्लकेज थुनागु हुनिं लः निकास जुयाच्वंगु धाःगु दु । विराटनगर ६ लेन सतक परियोजनां नं इलय् हे ज्या क्वमचायेकूबलय् लःया निकास मदूगु धाःगु दु । ६ लेन परियोजनाय् नं ठेकेदारयात ब्लकेज चायेकेत निर्देशन ब्यूगु मेयर पराजुलीं जानकारी ब्यूगु दु ।

Categorized in दुर्घटना-अपराध