वार्तापाखें हे समस्याया समाधान मालेमाः –नेपाल चिकित्सक संघ
नेवा: अनलाइन न्युज | २०७६ कार्तिक २५, सोमबार १४:३४:२७
नेपाल चिकित्सक संघं अनशन च्वनाच्वंम्ह प्रा.डा. गोविन्द केसीया जीवन रक्षाया नितिं तत्काल वार्ताया माध्यमं समस्याया समाधानय् ठोस पहल यायेत सरकायाके माग याःगु दु ।
संघं थौं सोमवाः छगू प्रेस विज्ञप्ति सार्वजनिक यासें चिकित्सा शिक्षा व स्वास्थ्य सेवाया अभियन्ता डा. केसीया डडेल्धुराय् जारी १७ क्वःगु आमरण अनशनया सम्बन्धय् गम्भीर ध्यानाकर्षण जूगु धासें वार्ताया माध्यमं समस्याया समाधान मालेत आग्रह याःगु खः ।
नेपाःया चिकित्सा शिक्षा व स्वास्थ्य सेवायात संविानया भावना व मर्म कथं स्थानीय तहतक थ्यंकाः सर्वसाधारण नागरिकपिनिगु सहज पहुँचया नितिं तःक्वःमछि शान्तिपूर्ण सत्याग्रहया माध्यमं सरकार व नीति निर्माण तहलय् दुपिन्त डा. केसीं सजग यानाः वयाच्वंगु धासें संघं विगतय् जूगु सम्झौताया अक्षरस कार्यान्वयन यायेगु नेपाल सरकारया दायित्व जूगु विज्ञप्तिइ न्ह्यथनातःगु दु ।
डा. केसी चिकित्सा क्षेत्र सुधारया माग तसें १८ कार्तिकनिसें अनशनय् च्वंगु खः । डा. केसी स्वास्थ्यकःमि निलकण्ठ भट्टया छेँय् अनशन च्वंगु खः । स्वास्थ्यय् समस्या वःगु धासें वयात भट्टया छेँपाखें जिल्ला अस्पतालय् यंकूगु खः ।
Categorized in राष्ट्रिय