telecom 18 kartik 2076

वडा ज्याकुथिइ मिँ च्यात, न्याम्ह गिरफ्तार

नेवा: अनलाइन न्युज | २०७६ आश्विन २७, सोमबार १७:१४:०९

उत्तरी मकवानपुरया थाहा नगरपालिका–५ वडा ज्याकुथिइ मिँ च्याःगु घटनाय् दुथ्याःगु आशंकाय् न्याम्हेसित प्रहरीं गिरफ्तार याःगु दु ।

सोमवाः बहनी नगरपालिकाया आरनडाँडाय् च्वंगु ज्याकुथिइ मिँ तःगुलिं दुथ्याःगु धासें न्याम्हेसित इलाका प्रहरी ज्याकुथि पालुङं गिरफ्तार याःगु खः । गिरफ्तारीइ लाःपिनिगु नां सार्वजनिक याःगु मदुनि ।

२६ गते बहनी ज्याकुथिया खापा तछ्यानाः पेट्रोल  व मचिकं छ्वाकाः मिँ तःगु धाःगु दु । पेट्रोल व मचिकं तयाः यंकूगु बोटल ज्याकुथि लिक्क लुयावयेधुंकाः प्रहरीं अनुसन्धान न्ह्याकूगु खः । मिँ च्याःगु झ्वलय् विद्युत मिटर बक्स मुयावःगु सः तायेधुंकाः गांया बासिन्दां घटनाबारे प्रहरीयात जानकारी ब्यूगु खः ।

मिँ च्यानाः ज्याकुथिया भ्वँ व फर्निचर नष्ट जूगु इलाका प्रहरी ज्याकुथि पालुङया प्रहरी निरीक्षक लोकबहादुर गुरुङं धाःगु दु । घटनाया जानकारी वयेखतं अनुसन्धानया नितिं प्रहरी परिचालन यानागु प्रहरी निरीक्षक गुरुङं जानकारी ब्यूगु दु ।

घटना जुइखतं सुरक्षा प्रमुख थाहा नगरय्

वडा ज्याकुथिइ जूगु मिँ च्याःगु घटनालिसें मकवानपुरया सुरक्षा प्रमुख थाहा नगर थ्यंकूगु खः । घटनाया बारे अध्ययनया नितिं मकवानपुरया प्रमुख जिल्ला अधिकारी प्रेमराज जोशी, मकवानपुरया प्रहरी प्रमुख मुकेश सिंह, सशस्त्र प्रहरी बलया प्रहरी उपरीक्षक विकास घिमिरेलिसेंया पुचः घटना जूगु थासय् थ्यंकूगु खः ।

घटनाया बारे सुक्ष्म मजूगु मकवानपुरया प्रहरी प्रमुख प्रहरी उपरीक्षक सिंहं जानकारी ब्यूगु दु । अनुसन्धानया नितिं सुं मनूतय्त नियन्त्रणय् कयाः कारवाही न्ह्यःने यंकागु उपरीक्षक सिंहं धाःगु दु ।

मिँ च्याःगु हुनिं ज्याकुथिया कम्प्युटर, प्रिन्टर लिसें विद्युतीय उपकरण व ज्याकुथि प्रयोजनया हलंज्वलं ध्वस्त जूगु प्रहरीं जानकारी ब्यूगु दु ।

Categorized in दुर्घटना-अपराध