chetrapa55

वइगु बैशाखय् लानिपुखूया पुनःनिर्माण ज्या क्वचाइगु

नेवा: अनलाइन न्युज | २०७६ मङ्सिर ११, बुधबार १६:१४:०४

वइगु बैशाखतकया दुने क्वचाइगु कथं ऐतिहासिक लानिपुखूया पुनःनिर्माण जुयाच्वंगु दु । आः पुखुली हाकूगु चाः तयेगु, पःखाः निर्माण यायेगु व दथु भागय् च्वंगु बालगोपालेश्वर देगः पुनःनिर्माण ज्या जुयाच्वंगु दु ।

२०७२ बैशाख १२ गते ब्वःगु भुखाचं क्षतिग्रस्त लानिपुखू व बालगोपालेश्वर देगः पुनःनिर्माणया ज्याय् स्वदँ लिपा लायेधुंकाः लिपांगु ई राष्ट्रिय पुनःनिर्माण प्राधिकरणं भाला काःगु खः । निर्धारित इलय् हे क्वचाइगु कथ ज्यां गति काःगु प्राधिकरणया दाबी दु ।

पुसया लिपांगु वाःतकया दुने पःखाः ग्वयेगु व पुखुली हाकूगु चा तयेगु ज्यां पूर्णता काइगु प्राधिकरणया सम्पदाविज्ञ राजुमान मानन्धरं धाःगु दु ।

अथेहे, बालगोपालेश्वर देगःया पुनःनिर्माणया ज्या तकं तीव्र रुपं जुयाच्वंगु दु । देगःया निर्माणया ज्या आः २० प्रतिशत क्वचाःगु दु । आः देगलय् सिंया ज्या जुयाच्वंगु दु । पःखाःया ज्या ८५ प्रतिशत क्वचाःगु दुसा पुखुया ज्या ४० प्रतिशत क्वचाःगु मानन्धरं जानकारी ब्यूगु दु ।

मानन्धरं धाःगु दु, “बैशाखतकया दुने नागरिकं पुलांगु हे शैलीया लानिपुखू स्वयेखनी । ल्यं दूगु ज्या नं नियमित रुपं जुयाच्वंगु दु ।”

सुरुआतय् येँ महानगरपालिकां पुनःनिर्मा०ा याये धाःसां नं गुबलें पुरातत्व विभागलिसे सा गुबले येँ महानगरपालिकाय् हे आन्तरिक कलह जुयाः स्वदँतक ज्या लिपा लाःगु खः ।

मन्त्रिपरिषया वंगु माघ १४ गतेया बैठकं लानिपुखू व बालगोपालेश्वर देगःलिसें उगु क्षेत्रय् च्वंगु पुरातात्विक संरचनाया पुनःनिर्माण प्राधिकरणयात भाला बिइधुंकाः निर्माणया ज्या न्ह्यःने वंगु खः ।

Categorized in राष्ट्रिय