ad 2076 5 18

लोकन्थलीया न्याखाछेँ जोखिमय्, छखाछेँ खालि यात

नेवा: अनलाइन न्युज | २०७६ भाद्र ३, मंगलबार १२:१६:३५

ख्वपया लोकन्थलीइ चलः (पहिरो) वनाः न्याखाछेँ जोखिमय् लाःगु दु । छखा छेँ खालि याःगु दु । चलखं न्यासि वनेगु लँपु तकं अवरद्ध जूगु दु ।

मंगलवाः सुथय् १ः४५ ता इलय् चलः कुतुंवंगु व आः छु यायेगु धकाः जिल्ला सुरक्षा समितिइ सहलह न्ह्यानाच्वंगु मध्यपुर थिमि नगरपालिका वडा ल्याः १ या नायः सुरज खड्कां जानकारी ब्यूगु दु । खड्काया कथं छेँ धाःसा चर्के जूगु मदु ।

मध्यपुर थिमि नगरपालिकाया वडा ल्याः १, २ व ३ य् त्वनेगु लःया समस्या दु । उकिं स्थानीय जनप्रतिनिधिपिं वयेधु.काः केन्द्र सरकारं बजेट माग यानाः वडा ल्याः १ य् ५ लख लिटर क्षमताया ट्यांकी दयेकेगु ज्या न्ह्याकूगु खः । ट्यांकी दयेकेत बजेज १ करोड ३२ लख खर्च जुइगु स्टिमेट याःगु खः ।

वधुंकाः ठेक्का बियाः वंगु बैशाख महिनानिसें ट्यांकी गाः म्हुइगु सुरु याःगु खः । तर, ज्या यानाः च्वंच्वं हे वा वयेगु सुरु जुल धासें ठेकेदारं ज्या दिकल । निन्हु प्यन्हु वा वयेगु क्रम दीधुंकाः भाद्र १ गते हाकनं सामान्य सुचुपिचु यायेगु धासें ज्या न्ह्याकल । तर, बहनीया वां यानाः तःम्हागु सिमा तकं क्वदल, चलः कुतुं वल ।

वडा ल्याः १ या वडाध्यक्ष खड्कां धाःगु दु, “ग्याबिन वाल तयेगु धकाः भच्चा म्हूगु खः, तर चलः वन ।”

गन लः ट्यांकी दयेकेगु धकाः गाः म्हूगु दु, व थाय् पाःल्हूगु थाय् खः । लः ट्यांकी निर्माणय् सावधानी मछ्यःबलय् चलः वंगु व छेँत जोखिमय् लाःगु स्थानीयपिन्सं धाःगु दु । चलःया हुनिं उगु थासय् च्वंगु लँपु तकं कुतुं वनाः न्यासि वनीपिन्त थाकूगु दु ।

वडाध्यक्ष खड्काया कथं न्हापांगु दँ नं अन डेढ फिट दुनावंगु खः । उकियात सामान्य मर्मत याःगु खः । तर, बांलाक्क व बलाक्क मर्मत मयाःगुलिं आः चलः वंगु वडाध्यक्ष्ँ खड्कां अनुमान याःगु दु ।

चलः वंगु थासय् थ्यंकाः प्रमुख जिल्ला अधिकारी, जिल्ला सुरक्षा प्रमुख, सांसद महेश बस्नेत व स्थानीय तहया जनप्रतिनिधिपिन्सं थौं मंगलवाः सुथय् अवलोकन याःगु खः । अवलोकन धुंकाः सहलह यायेत मंकाः बैठक च्वनाच्वंगु दु ।

Categorized in दुर्घटना-अपराध