chetrapa55

रुपेन व दियाया न्हूगु म्यूजिक भिडियो ‘वयेमते छ आशा क्यंका...’ यूट्युबय् (भिडियो)

नेवा: अनलाइन न्युज – ललेन्द्र शाक्य | २०७६ मङ्सिर १७, मंगलबार १३:३५:०९

नेवाः सुपरस्टार दाबेदार व नेपालभाषा स्टार म्यूजिक भिडियो अवार्डय् उत्कृष्ट मिजं मोडलय् टप १० य् नोमिनेट जूम्ह लिसें नेपालभाषा संकिपा ख्यःया हिरो व दकले अप्वः म्यूजिक भिडियो म्हितादीम्ह नांजाःम्ह कलाकार रुपेन श्रेष्ठ थक्वाःमिया न्हूगु म्यूजिक भिडियो हाईलाइट्स नेपाल यूट्युब च्यानलय् अपलोड जूगु दु । उगु म्यूजिक भिडियोय् रुपेन श्रेष्ठ थक्वाःमिलिसे न्हूम्ह मोडल दिया श्रेष्ठ मू भुमिकाय् म्हितादीगु दु ।

हसना शाक्यया सलय् सुमन चित्रकारया च्वसाय् व सुमन कपालीया संगीत व संयोजनय् पिदंगु ‘वयेमते छ आशा क्यंका...’ बोलया म्येया म्यूजिक भिडियोया निर्देशक लूजः सिंह खःसा क्यामेरा पर्सन व सम्पादक योवन शाक्य ‘१४के’ खः ।

मुक्कं लू किपूया २ वडा द्यःध्वाखा त्वाःया माःक्वाःचा गार्डेनय् सुटिङ्ग यानातःगु थुगु ‘वयेमते छ आशा क्यंका...’ म्येया म्यूजिक भिडियोय् दिया श्रेष्ठ न्हूम्ह कलाकार जूसां बांलाक्क अभिनय यानातःगुलि. दिया छम्ह प्रतिभावान् बांलाःम्ह कलाकार खः धकाः धायेछिं ।

अथेहे, थुगु म्येया विषयस कलाकार रुपेन श्रेष्ठं धयादी, “थुगु म्येया म्युजिक भिडियो १० महिना न्ह्यः हे पिदनेमाःगु खः, तर आः नकतिनि जक पिदन । कारणवश फुक्क फिक्स जूसां नं सुटिङ्गया ज्या न्ह्याके जक मफुगु खः ।”

कलाकार रुपेन श्रेष्ठं न्हूम्ह मोडल दिया श्रेष्ठयात थुगु म्येपाखें ब्रेक बियागु खँ न्ह्यथसें धयादी, “दियां थुगु म्येया सुटिङ्गया झ्वलय् बांलाक्क अभिनय याइमखु कि धैगु पीर जुयाच्वंगु खः, तर अथे मखुसे दियां बांलाक्क हे अभिनय यानाः भिडियोया स्तरीयता थकायेगु ज्याय् ग्वाहालि याःगु दु । अय्सां दिया न्हूम्ह मोडल जूगुलिं छुं भच्चा धाःसा थाकुल ।”

नांजाःम्ह म्यूजिक भिडियो निर्देशक लूजः सिंह व क्यामेरा पर्सनलिसें सम्पादक योवन शाक्य ‘१४के’ नापं ज्या याःगु दकले न्हापांगु थुगु म्यूजिक भिडियोया मेकअप आर्टिष्ट सरीता बज्राचार्य खः ।

(थन क्लीक यानाः भिडियो स्वयादिसँ)

Categorized in कला