telecom 18 kartik 2076

राष्ट्रपति सीया भ्रमण : ‘फ्री तिब्बत’या झोला म्यूपिन्त अभद्र व्यवहारया मुद्दा

नेवा: अनलाइन न्युज | २०७६ आश्विन २६, आइतबार १७:२१:५०

मानवअधिकारकःमि विरुद्ध नं मुद्दा

चिनियाँ राष्ट्रपति सी जिनफिङया भ्रमणया पूर्वसन्ध्याय् फ्रि तिब्बत च्वयातःगु झोला म्यूगु द्वपनय् ज्वंपिं निम्हेसित अभद्र व्यवहारया कसूरय् म्याद थप जूगु दु ।

बौद्धया फूलबारीइ च्वंगु पसलं गिरफ्तार याःपिं येँ–६ या दवाङ निमा लामा व कास्कीया हिस्सी ग्याडो लामाविरुद्ध जिल्ला प्रशासन ज्याकुथिं म्याद थप यानाः अनुसन्धान न्ह्याकूगु खः ।

महानगरीय प्रहरी वृत्त बौद्धया डिएसपी रमेशबहादुर सिंहं धाःगु दु, “बिहिवाः हे म्याद थप यानाः अनुसन्धान यानाच्वनागु दु ।” सिंहया कथं गिरफ्तारी लाःम्ह निमाया पाखें फ्रि तिब्बत च्वयातःगु ध्वाँय् २५ थान, ध्वाँय् च्वयातःगु झोला निगू, चीपाःगु झोला ६० थान लिसें बरामद याःगु खःसा हिस्सीया पाखे. फ्रि तिब्बत च्वयातःगु किरिङ ३८ थान, तिब्बत च्वयातःगु तःपाःगु झोला ३, चीपाःगु झोला ६ थान लिसें बरामद जूगु खः ।

अनुसन्धान अधिकृतपिनिगु कथं इमिसं पसलय् सुचुकाः उगु हलंज्वलं मिइगु याःगु खः । तर, बयानया झ्वलय् धाःसा न्हापा हे मौज्दात दूगु सामान मियागु दाबी याःगु दु ।

निगू दशकलिपा जूगु चिनियाँ राष्ट्रपतिया नेपाः भ्रमणया तयारी कथं महिना दिं न्ह्यःनिसें हे बालुवाटारय् च्वंगु चिनियाँ दूतावासं ‘थ्रेट एनालाइसिस’ याःगु खः । दूतावासय् दूगु ‘क्लोज प्रोटेक्सन युनिटं’ चिनियाँ विदेश मन्त्रालयलिसे समन्वय यानाः सुरक्षा तयारी याःगु खः । उकियात तकं आधार दयेकाः नेपाली सेनां सुरक्षा प्रबन्ध मिलेयाःगु खः ।

उगु अवधिइ ‘फ्रि तिब्बत अभियान’य् दुथ्याःम्ह मनू व तिब्बती शरणार्थीं राष्ट्रपतियात हाकू ध्वाँय् क्यनेफूगु आकंलन याःगु खः । वहे कथं नेपाल प्रहरी, सशस्त्र प्रहरी बल, राष्ट्रिय अनुसन्धान विभाग खटेजूगु खः ।

वहे झ्वलय् येँपाखें जक २४ म्ह संकित मनूत प्रहरीं गिरफ्तार याःगु दु । येँ प्रहरी परिसर, टेकुया डिएसपी होविन्द्र बोगटीं धाःगु दु, “गिरफ्तारी लाःपिं सीकं वा मसकिं फ्रि तिब्बतया टिसर्ट फिनातःपिं अप्वः लाःगु दु ।” गुलिखे तिब्बती मूलया नेपाली व सुं नेपाली तकं लाःगु बोगटीं धाःगु दु । बोगटीया कथं इपिं बौद्ध, स्वयम्भू व फर्पिङ्ग क्षेत्रं गिरफ्तारीइ लाःगु खः ।

प्रहरीया कथं फ्रि तिब्बतया विषयस ज्ञापन पौ लःल्हायेत वंगु द्वपनय् छम्ह मानव अधिकारकःमि नं गिरफ्तारीइ लाःगु दु । गिरफ्तारीइ लाःम्ह बीपी पौडेल खः ।

पौडेलयात नं अभद्र व्यवहारया कसूर अन्तर्गत म्याद थप यानाः अनुसन्धान जुयाच्वंगु डिएसपी बोगटीं धाःगु दु ।

भ्रमणया पूर्वसन्ध्याय् बानेश्वरय् लसकुसया नितिं तयातःगु बोर्ड खूगु द्वपनय् गिरफ्तारीइ लाःपिं निम्ह धाःसा त्वःतूगु दु । इमिसं अय्लाः त्वनाः खूगु पुष्टि जुइधुंकाः सम्झेयानाः त्वःतूगु खः ।

डिएसपी बोगटीं धाःगु दु, “समग्रय् चिनियाँ पाहाँया आगमनय् सुरक्षाया दृष्टिं छुं नं समस्या मजुल । थ्व बांलाःगु पक्ष खः ।”

Categorized in राजनीति