chetrapa55

रामवीर मानन्धरया राजनीतिक यात्रा (भिडियो)

नेवा: अनलाइन न्युज – ललेन्द्र शाक्य | २०७६ मङ्सिर ५, बिहिबार १६:०६:५९

वडा अध्यक्षं न्ह्याःगु राजनीतिक यात्राय् येँया ७ नम्बर क्षेत्रया सांसद जुसें राज्यमन्त्रीतकया राजनीतिक यात्राय् रामवीर मानन्धर थ्यंगु दु ।

थ्यंमथ्यं वंगु दच्छि न्ह्यः मंसीर २३ गते थःगु निर्वाचन क्षेत्रया सांसद पदं राजीनामा बियाः उगु क्षेत्रय् नेपाल कम्युनिष्ट पार्टीया बरिष्ठ नेता बामदेव गौतमयात थनेगु आकाझाकां राजनीति यायेवं नेपाःया राजनीतिइ हे न्हूगु तरंग हयाब्यूगु खः ।

थः सांसद पदं मुक्त जुयाः बामदेवयात हयेगु थुगु राजनीतियात आपासिनं बामदेवयात प्रधानमन्त्री दयेकाः रामवीर राष्ट्रियसभाया सांसद जुयाः मन्त्री पद नयेगु दाऊ याःगु धकाः वय्कःयात द्वपं ब्यूगु खः ।

रामवीरं थ्व पलाः छाय् ल्ह्वन धैगु खँय् वय्कःया पार्टी नेपाल कम्युनिष्ट पार्टी दुने जक मखु, देय् न्यंकं हे राजनीति ख्यलय् हलचल हःगु खः । गुकियात कयाः यक्व टिक्काटिप्पणी जूगु खःसा अन्ततः नेपाल कम्युनिष्ट पार्टीं वय्कलं थथे ब्यूगु राजीनामा अस्वीकृत याःगु खः ।

नेपाल कम्युनिष्ट पार्टी दुने थथे रामवीर मानन्धरं ब्यूगु राजीनामा प्रधानमन्त्री केपी शर्मा ओलीयात ब्यूगु तःधंगु ख्याच्वः कथं काःगु खः । थथे ख्याच्वः छाय् बिल, थ्व आधिकारिक रुपं गनं पुष्टि मजूसां राजीनामा ब्यूगुया कारण केपी ओलीया सरकारय् मन्त्री मदयेकूगुलिं हे खः धैगु खँ नं उगु इलय् चर्चाय् वःगु खः ।

रामवीरं ल्ह्वंगु थ्व पलाः लिपा यक्वसिनं रामवीरया राजनीति सिधल, येँया ७ नम्बर क्षेत्रय् आः नेपाल कम्युनिष्ट पार्टीया सुं नं उम्मेदवार त्याइमखुत धैगु खँ हुइनाभुइना जूगु खः । व रामवीर सांसद खयां नं जनस्तरय् गुगुनं ज्याझ्वलय् खनेमदयावंगु खः । तर रामवीर हाकनं गुथि विधेयकविरुद्ध जूगु आन्दोलनय् खनेदत । संचार माध्यमपाखें वय्कलं संचारमन्त्रीलिसें सरकारया प्रवक्ता गोकुलप्रसाद बाँस्कोटां गुथि धैगु सामन्तवाद खः धकाः न्वःवायेवं थुकियात कयाः कडा प्रतिवाद यासें गुथि आन्दोलनया पक्षय् दनाः सरकारयात विरोध याःगु खः ।

थ्वया लिपा रामवीर हाकनं जनताया राजनीतिइ बुलुहुँ खनेदूगु खः । रामवीर मानन्धर व्यवसायी रुपं यातायात व्यवसायी व चलचित्र निर्माता खःसा वय्कः २०४९ सालय् जूगु स्थानीय चुनावय् तत्कालीन माले पार्टीपाखें चुनावय् दनाः येँया १६ वडाया वडाध्यक्ष पदय्  त्याकादिल । थ्वया लिपा रामवीरया राजनीतिक यात्राय् गुबलें पराजय जुइगु कथं मजुल । थ्वया लिपा २०५४ सालय् जूगु स्थानीय चुनावय् नं वय्कः वडाध्यक्ष पदय् त्याकादिल । अथेहे, २०७४ सालया विधानसभाया चुनावय् नांजाःम्ह व्यक्तित्व हिसिला यमियात बुकाः सांसद पदय् त्यातसा थ्वया लिपा रामवीर मानन्धर नेपाःया राजनीति ख्यःया चर्चित व्यक्तित्व जुयाबिल ।

राजनीतिइ गुबले गुगु मोड काइ धायेफइगु खँ मखु । थुकिया दसि रामवीर मानन्धर जूगु दु । रामवीरया राजनीति सिधल धकाः जुयाच्वंगु चर्चा क्वमचानिबलय् हे आकाझाकां हाकनं शहरी विकास राज्यमन्त्री जुइवं सकलसित अजू चायेकूगु दु ।

(थन क्लीक यानाः भिडियो स्वयादिसँ)

Categorized in राजनीति