telecom 18 kartik 2076

रानीशोभाया न्हापांगु म्यूजिक भिडियो ‘चेलीको आँशु’ पिदन (भिडियो)

नेवा: अनलाइन न्युज – ललेन्द्र शाक्य | २०७६ आश्विन १०, शुक्रबार १४:२४:०१

इन्द्रेणी सांस्कृतिक समाज (इसास) किपू दुने सांगितिक यात्रा न्ह्याकूगु सुरुंनिसें थौंतक निरन्तर रुपं उगु संस्थाय् आबद्ध जुयाः वयाच्वनादीम्ह उत्कृष्ट सःया प्रतिभा दुम्ह किपूया म्येहालामि रानीशोभा महर्जनया न्हापांगु याकः म्यूजिक भिडियो पिदंगु दु ।

नांजाःम्ह जनगायकलिसें संगीतकार व नेपाल संगीत व नाट्य प्रज्ञा प्रतिष्ठानया कुलपति रायन श्रेष्ठया संगीत व रचना दुथ्याःगु व सुरेन्द्र श्रेष्ठया संगीत संयोजनय् म्येहालामि रानीशोभा महर्जनं हालातःगु ‘चेलीको आँशु...’ बोलया म्येया म्यूजिक भिडियो आः नकतिनि जक ओएसआर डिजिटल नांया यूट्युबय् पिदंगु खःसा थुगु म्ये क्षेत्रपातिया सूर मेलोडी रिकर्डिङ्ग स्टुडियोस रिकर्ड यानातःगु खः ।

संजित के. घिसिङया छायांकन–सम्पादन व निर्देशनय् निर्माण जूगु थुगु म्येया म्यूजिक भिडियोया नितिं कुतुम्ब ब्याण्डया तालबाजा थानामि राजु महर्जनलिसें नांजाःम्ह म्येहालामि रत्नशोभा महर्जन, संगीत संयोजकलिसें म्येहालामि सुरेन्द्र श्रेष्ठ, असीम महर्जन व रोहित महर्जनपिन्सं विशेष ग्वाहालि यानादीगु दु । लुमंकेबहःजू, कुतुम्ब ब्याण्डया तालबाजा थानामि राजु महर्जन म्येहालामि रानीशोभा महर्जनया जीवनपासा खः ।

म्येहालामि रानीशोभा महर्जनं अतिकं मार्मिक सलं हालातःगु थुगु ‘चेलीको आँशु...’ म्ये यूट्युबपाखें सार्वजनिक जुइधुंकाः संगीत ख्यलय् छगः थीगु  न्हूगु नगुया उदय जूगु खँ संगीत पारखीपिन्सं चर्चा परिचर्चा यानाहःगु दु ।

वंगु सेप्टेम्बर २४ तारिखय् अपलोड याःगु थुगु भिडियो आःतकया दुने थ्यंमथ्यं न्याद्वः मनूतसें स्वयेधुंकूगु दु ।

(थन क्लीक यानाः भिडियो स्वयादिसँ)

Categorized in कला