ad 2076 5 18

रसुवाय् चलः, १० खाछेँ व छगू स्कूल जोखिमय्

नेवा: अनलाइन न्युज | २०७६ भाद्र ८, आइतबार ११:०४:२०

तच्वकं वा वयेधुंकाः कुतुंवःगु चलखं रसुवाया ७ रोपनी वाबाली चुइकूगु दु । चलखं १० खाछेँ व छगू स्कूलतकं जोखिमय् लाःगु दु ।

जिल्लाया कालिका गाउँपालिका–४ धुसेनीइ शुक्रवाः बहनी कुतुंवःगु चलखं थ्यंमथ्यं ७ रोपनी वाबाली चुइकूगु खः ।

रसुवाया प्रमुख जिल्ला अधिकारी अर्जुन भण्डारीं शुक्रवाः धुसेनीया देवकोटा त्वालय् कुतुंवःगु चलखं स्वंगू छेँजःया ७ रोपनी बुँ चुइकूगु जानकारी ब्यूगु दु । प्रजिअ भण्डारीया कथं, १० खाछेँ व छगू स्कूलतक. चलःया हुनिं जोखिमय् लाःगु दु । सेतीबेनी मा.वि. व देवकोटा त्वाःया १० खाछेँ चलखं जोखिमय् लाःगु खः ।

रसुवाया प्रमुख जिल्ला अधिकारी भण्डारी लिसेंया पुचलं शनिवाः चलखं लिच्वः लाःगु क्षेत्रया स्थलगत अवलोकन याःगु खः ।

भण्डारीं शनिवाः चलखं लिच्वः लाःगु देवकोटा त्वाःया स्थलगत अवलोकन यानाः स्थानीयबासीलिसे सहलह व परामर्श याःगु जानकारी ब्यूगु दु ।

खासयानाः रसुवा चलःया जोखिमय् लाःगु हिमाली जिल्ला खः । छवाः न्ह्यःजक भोटेकोसीइ खुसिबाः वयाः टिमुरे व रसुवागढी स्वाःगु तां चुइकूगु खः ।

Categorized in दुर्घटना-अपराध