ad 2076 5 18

रद्द जुल अमेरिका व तालिवानी विद्रोहीदथुया वार्ता

नेवा: अनलाइन न्युज | २०७६ भाद्र २२, आइतबार १४:०६:३८

अमेरिकां तालिवान विद्रोहीलिसे यायेगु धाःगु शान्ति वार्ता आःवयाः रद्द जूगु दु ।

अमेरिकी राष्ट्रपति डोनाल्ड ट्रम्पं आइतवाः अफगानिस्तानया राष्ट्रपति असरफ घानी व तालिवानया उच्च नेतातलिसे वार्ता तयार  याःगु खः । तर, ट्रम्पं छगू ट्वीट यासें तालिवानलिसे तय जूगु वार्ता रद्द जूगु जानकारी ब्यूगु दु ।

अफगानिस्तानया राजधानी काबुलय् आः नकतिनि जूगु आक्रमणलिपा ट्रम्पं निर्धारित वार्ता रद्द याःगु खः । छम्ह अमेरिकी सैनिकया ज्यान वनेगु कथं जूगु उगु आक्रमणया जिम्मा तालिवानं काःगु खः ।

अमेरिकी वार्ताकार जल्मे खालिजजादं तालिवानलिसे सिद्धान्तया आधारय् शान्ति सम्झौता जुइगु घोषणा याःगु खः ।

अमेरिका व तालिवानया प्रतिनिधिपिं दथुइ कतारया राजधानी दोहाय् जूगु ९ चरणया वार्ता लिपा खालिजजादं उकिया खुलासा याःगु खः ।

प्रस्तावित सम्झौताय् अमेरिकां अफगानिस्तानय् तैनाथ थः छ हजार ४ सय सेना २० वाःदुने लितकायेगु लिसेंया विष न्ह्यथंगु खः ।

आः अफगानिस्तानय् अमेरिकाया थ्यंमथ्यं १४ हजार सेना तैनाथ दु । अय्सां, ट्रम्पं उकी लिपांगु स्वीकृति बिइधाःसा ल्यंदनि ।

आइतवाः वार्ता यानाः उकियात लिपांगु तयारी बिइगु धाःसां नं तालिवानी आक्रमण लिपा लिपांगु इलय् वयाः वार्ता रद्द जूवंगु दु ।

सन् २००१ निसें अफगानिस्तानया आपालं भूभागय् तालिवानं नियन्त्रण कयातःगु दु । तालिवानया दबदबा काय जुसांनिसें हे अन अमेरिकी सैना तैनाथ जूगु खः ।

अफगान सरकारं वार्ताया नितिं तालिवानलिसे विगतनिसें हे वार्ताया प्रस्ताव यानाः वयाच्वंगु दु । तर, अफगानी सरकार अमेरिकाया मोहोरा जूगु धासें वं वार्ताया प्रस्ताव अस्वीकार यानाः वयाच्वंगु दु ।

Categorized in अन्तर्राष्ट्रिय