ad 2076 5 18

रक्तचाप नियन्त्रणया नितिं चकलेट

नेवा: अनलाइन न्युज | २०७२ चैत्र ४, बिहिबार ११:१२:१८

वैज्ञानिकतसें मनूया दैनिक जीवन व ल्वय्या सम्बन्धयात कयाः थीथी कथंया अध्ययन अनुसन्धानत याना वयाच्वंगु दु । थुकिया हे वलय् झीसं न्हियान्हिथं नया वयाच्वनागु चकलेटयात कया नं मनूयात लाइग थीथी ल्वय्यात कयाः थीथीकथंया अनुसन्धाया वलय् उच्च रक्तचाप नियन्त्रणया सम्बन्धय् नं अनुसन्धान जूगु दु । थुगु अनुसन्धानं यदि मनुखं न्हियान्हिथं पाय्छि मात्राय् न्हियांनिथं चकलेट नयेगु यानाच्वन धाःसा थुकिं उच्च रक्तचाप नियन्त्रण यायेत ग्वाहालि जुइगु क्यंगु दु । थुगु अनुसन्धानं मात्रा मिले यानाः चकलेट नयेफत धाःसा थुकिं रक्तचाप म्हो यायगु या लिसें नुगःचु लिसें स्वापू दुगु थीथी च्वय् कमि हयेफु धाःगु दु । थुगु अध्ययनं लुइकूगु लिच्वःयात नकतिनि पिदंगु ‘जर्नर अफ अमेरिकन मेडिसन’ नांया विज्ञान पत्रिकाय् पिथंगु दु ।


    थुगु जर्नरय् प्रकाशित जूगु खबर कथं अनुसन्धाकर्तातसें उच्च रक्तचापया ४४ म्ह रोगीतय्त निगू पुचलय् ब्वथलाः अनुसन्धान याःगु खः । छगू पुचःयात न्हियान्हिथं ६ ग्रामया दरं आपा कोको नांया तत्व दुगु चकलेट नकूगु खःसा मेगु छगपू पुचःयात धाःसा कोको मदुगु तुयुगु चकलेट नकूगु खः । छुं न्हि लिपा उमिगु रक्तचापया परिक्षण याःगु यलय् कोको तत्व दुगु हाकनुगु चलेट नःगु पुचःया मनूतय् रक्तचाप म्हो जूगु लुयावल धाःसा मगु पुचःया मनूतय् रक्तचाप धाःसा न्हापा गथे खः अथे हे जुयाच्वंगु खः । कोको (चकलेट दयेकीगु तत्व) झीगु उसायँया लागि भिं धकाः न्हापा हे धयातःगु खः । थुकिं रक्तचापयात म्हो याइ धइगु खँ न्हापां निसें धयावयाच्वंगु खः । तर प्रमाणित रुपं हे कोकों नांया तत्वं मनूया रक्तचापयात म्हो यानाबिइ न्ह्यब्वःगु थ्वहे न्हापांखुसि खः । कोकोस फ्लावानल्स नांया छगू तत्व दइ । थुगु तत्वं रक्तचाप म्हो यायेत ग्वाहालि याइगु नं वैज्ञानिकतसें लुइकूगु दु । न्हापा न्हापा रक्तचाप म्हो यायेत आपालं मात्राय् कोको माः धइगु तायेकाः वयाच्वंगु खः । तर आः वया यूनिभर्सिटी हस्पिटल अफ कोलोनया अनुसन्धानकर्तासें अध्ययन यानाः धाःगु दु कि न्हियान्हिथं ३० क्यालोरी शक्ति बिइगु कथंया मिले यानाः चकलेट नल धाःसा झीगु उसायँयात भिं जुइ धइगु लिच्वः पिकाःगु दु ।


    अनुसन्धानकर्तातसें ५६ द“ निसें ७३ दँ तकया मनूतय्त सीमित मात्राय् चकलेट नकूगु खः । चकलेट नके धुंकाः उमिगु म्हया ग्यसू वा तौल अले ग्लुकोजया मात्राय् ला छुं ह्यूपाः मवल तर उमिगु रक्तचापया मचा म्हो जूगु लुइकल । थुगु अध्यननया अनुसन्धानकर्तातसें धाःगु दुगु कि उमिसं म्होचा जक रक्तचाप म्हो जुल अयनं थ्व चिकित्सा विज्ञानया ख्यलय् तसक प्रभावकारी व उत्साहित याइगु ख“ सावित जूगु दु ।
    अनुसन्धाकर्तातसें चिकित्सकतसें रक्तचापया रोगीयात थःगु जीवन यापनय् ह्यूपाः हयेत थीथी क्रियाकलापया बारे छ्याता बिइबलय् चकलेट नं नयेत छ्याता बिइत इनाप याःगु दु । थुकिया लिसलय् ब्रिटिश हर्ट फाउन्डेसनया खाद्य विशेषज्ञ सारा स्टेनरं धाःगु दु कि उच्चरक्तचापया रोगीयात चकलेट नयेत प्रोत्साहित यायेबलय् थुकिं जुइ फुगु नकारात्मक प्रभावया बारे नं विचाः यायेमाः । चकलेटय् चिल्लो पदार्थ व क्यालोरी नं आपालं मात्राय् दयाच्वनी । चकलेटय् दइगु थुगु चिल्लो पदार्थं यानाः उकिं नुगःचुयात नं नोक्सान यायेफु । बेलायातया व्रिटिश हर्ट फाउन्डेसनं धाःगु दु कि चकलेट नयेगु चीज जक खः वासः मखु ।
    चकलेटं वासःया रुपय् ज्या याइ कि याइमखु धइगु ख“ थःगु थासय् दु । तर थः मस्तय्त अल थः नं चकलेट नयेधुंकाः वा चुलेगु अले म्हुतु लखं कुल्ला मयाये खःसा थुकिं वा स्यंका मनूया ख्वाःयात हे कुरुप याना बिइगु ख“ धाःसा सकसिनं वाःचायेकेमाः ।