chetrapa55

येँय् व यलय् ‘सनाखत’ संकिपाया शुटिङ्ग धमाधम

नेवा: अनलाइन न्युज – विजयरत्न | २०७६ मङ्सिर २३, सोमबार १७:००:१८

नेपालभाषा संकिपा ख्यलय् नांजाःम्ह निर्देशक व कलाकारलिसें नेवाः सुपरस्टार दाबेदार आर्यम नकःमिया निर्देशनय् निर्माण जुयाच्वंगु संकिपा ‘सनाखत’या शुटिङ्ग येँय् व यलय् धमाधम जुयाच्वंगु दु ।

ख्यालिजुजु मदनकृष्ण श्रेष्ठया मू भूमिका दूगु  थ्व फिल्मया शुटिङ्ग थौंकन्हे येँया जनबहाः पिनेसं केलत्वालय् नेपाः कापः पसः दुगु छेँय् जुयाच्वंगु दु ।  थ्व छेँय् धइगु लोकंह्वाःम्ह म्येहालामि व लिपि अभियन्ता पवित्र कसाः व भाषाह्यःमि कलाकार प्रबोध कसाःया छेँय् खः । थ्व च्वमि शुटिङ्ख स्पटय् थ्यंबले ख्यालिजुजु मदनकृष्ण श्रेष्ठ , भृगुराम श्रेष्ठ व गणेश सायमि दथुइ पासा म्हितूगु लूया शुटिङ्ग जुयाच्वंगु खः । पासा कासाय् मदनकृष्ण श्रेष्ठं दाउ लाकाः त्याकीगु जुयाच्वन ।

थ्व लू धुंकाः मदनकृष्ण श्रेष्ठया परिवार दथुया लू खिचेयायेगु तयारी न्ह्यात । मंसीरया महिना भ्वय्या सिजन जुगुलिं कलाकार राजेन्द्रमान शाक्य हथाये चायाच्वन । सनिलया न्याता पुलेधुंकल तर तयारी धाःसा क्वमचाःनि । ख्यालिजुजु श्रेष्ठया म्ह्याय्  सराना बुद्धवाः अमेरिका लिहाँ वनिगु जुगुलिं वयकःया छेँय् पाहाँ वयाच्वंगु जुयाच्वन । वयकःपिनिगु नुगः हथाये चाःगुलिं तयारी लिबानाच्वंगु थें च्वंगु जुयाच्वन । मखु धइगु खःसा उलि ई धइगु सामान्य रुपं काइगु हे खः।

क्यामेरा पर्सन दिपेन बस्न्यात थःगु ज्याय् व्यस्त जुयाच्वन । निर्देशक आर्यम नकःमि सिनय् माःपि कलाकारपिन्त सिनया बारे ध्वाथुकेगुलिइ व्यस्त । थ्व सिनय् मदनकृष्ण श्रेष्ठ, राजेन्द्रमान शाक्य, सुनिता श्रेष्ठ, किरणकेन रन्जित, कन्चन तुलाधर व रबिना शाक्य लगायतया कलाकारपिन्सं ब्वति काइगु जुयाच्वन ।

ए.एन. इन्टरटेन्टमेन्टया ब्यानरय् निर्माण जुयाच्वंगु थ्व संकिपा ‘‘सनाखत’ सामाजिक वियोगान्त बाखंया लिधंसाय् निर्माण जुइगु संकिपा ‘सनाखत’या सुटिङ्ग ज्याझ्वः थ्वहे वाःया दुने जुइगु जानकारी संकिपाया निर्देशक व निर्माता आर्यम नकःमिं जानकारी बियादिल।

आर्यम नकःमिलिसें नेपाली संकिपाबञ्जा गोपालकाजी कायस्थ व सपना शर्मा मंकाः कथं निर्माता जुयादीगु संकिपा ‘सनाखत’या बाखं लक्ष्मण राजवंशीं च्वयादीगु दुसा संकिपा नेपालभाषा व खस नेपाली भाषां निर्माण जुइगु जानकारी नं बियादिल ।

संकिपा ‘सनाखत’या नितिं एन.आर.एन.या नं लगानी दइगु खँ दु । बेलायतय् च्वनाच्वंम्ह कलाकार मनिषकुमार श्रेष्ठ व अमेरिकाया नेवाःतय्गु संस्था वर्ल्ड नेवाः अर्गनाइजेशनपाखें नं संकिपा निर्माणया नितिं आर्थिक ग्वाहालि जुइगु जानकारी बिसें संकिपाया निर्माता निर्देशक आर्यम नकःमिं संकिपा ख्यालिजुजु मदनकृष्ण श्रेष्ठया लिसें नारायणदेवी प्रधान, धीरेन शाक्य, सविन शाक्य, मनिषकुमार श्रेष्ठ, रविन्द्र खड्का, अर्णेश्वरी शिल्पकार, सुनिता ठाकुर, मदनदास श्रेष्ठ, राजाराम पौडेललिसें मेमेपिं कलाकारपिनिगु मू भूमिका दइगु जानकारी बियादीगु दुसाः नेपाः कापः पसलय् जुयाच्वंगु शुटिङ्ग क्वचाल कि मेन कलाकार मदनकृष्णया ज्याजंक्वःया शुटिङ्ग जक ल्यनि ।

थ्व फिल्मया सकलें कलाकारपिनिगु ब्वति दइगु थ्व जंक्वःया लू थ्व ‘सनाखत’ संकिपाया छगू तःजिगु व महत्त्वपूर्ण लू जुइगु खँ नं संकिपामि नकःमिं जानकारी बियादिल । थुगु ‘सनाखत’ संकिपाया सहायक निर्देशक राजन शाही खः ।

Categorized in कला