ad 2076 5 18

येँया २४४९ म्ह ब्यापारी नेपाल गुणस्तर–नापतौल ज्याकुथिपाखें कारवाहीलय्

नेवा: अनलाइन न्युज | २०७६ जेठ २५, शनिबार १२:२२:०१

नेपाल गुणस्तर व नापतौल ज्याकुथि येँपाखें २४४९ म्ह व्यापारीपिन्त कारवाही याःगु दु ।

ज्याकुथिं चालू आर्थिक दँया आःतक नापेयायेगु व जोखेयायेगु यन्त्र जाँच व नवीकरण मयाःगु धासें उपिं व्यापारीपिन्त कारवाही याःगु खः ।

ज्याकुथिया प्रमुख व उपसचिव राकेशकुमार झा नं तौलय् घटीबढी यानाः सामान विक्री वितरण याःपिं व इलय् नापेयायेगु यन्त्र परीक्षण मयाःपिं व्यापारीपिन्त कारवाही याःगु जानकारी ब्यूगु दु । झा नं धाःगु दु, “नापतौल ज्याकुथिया मापदण्ड अःखः ज्या याःपिं ब्यापारीपिन्त कारवाही यानागु खः ।”

चालू आर्थिक दँय् १०४३ म्ह व्यापारीपिन्सं नापेयायेगु व जोखेयायेगु यन्त्रया नितिं अनुमति पौ काःगु दुसा ४५ म्ह व्यापारीया इजाजत पौ नवीकरण याःगु दु ।

३७३४ म्ह ब्यापारीं नापेयायेगु व जोखेयायेगु यन्त्र, ४६२ क्वः पेट्रोलियम पदार्थ वितरण याःगु पेट्रोल पम्प व ३० क्वः पेट्रोलियम पदार्थ ढुवानी याःगु ट्यांकरयात जाँच याःगु ज्याकुथिं जानकारी ब्यूगु दु ।

ज्याकुथिं चालू आर्थिक दँ नापतौल यन्त्र दर्ता, नवीकरण व पेट्रोल पम्प जाँचपाखें ९२ लख ७१ ह्जार ३०३ तका राजशव मुंकूगु खः ।

Categorized in बजाः