ad 2076 5 18

येँया बाफलय् अवैधानिक रुपं तयातःपिं ९ म्ह मचात उद्धार

नेवा: अनलाइन न्युज | २०७६ भाद्र ४, बुधबार १४:४६:२५

येँया बाफलय् च्वंगु नमूना प्रगतिशील महिला समाजय् मचातय्त अवैधानिक रुपं तयातःगु सीदूगु दु ।

बुधवाः बालबालिका खोजतलास केन्द्र व राष्ट्रिय बालअधिकार परिषदया मंकाः पुचलं अनुगमन याःबलय् नागार्जुन नगरपालिका–४ बाफलय् च्वंगु उगु थासय् ९ म्ह मचातय्त अवैधानिक रुपं तयातःगु सीदूगु खः ।

वैधानिक हैसियत खनेमदुगु संस्थां मचातय्त मापदण्ड अःखः तयातःगु सीदूगु बालबालिका खोजतलास केन्द्रया प्रहरी निरीक्षक मोहनविक्रम केसीं जानकारी ब्यूगु दु । वं उपिं मचातय्गु उद्धार यायेगु जानकारी ब्यूगु दु । वं धाःगु दु, “स्थानीय प्रहरी व वडाध्यक्षपिन्त सःतागु दु, आः इमिगु उद्धार यायेगु जुइ ।”

मचातय्त बाल यौनदूराचार जूगु न्यनागु धासें केसीं थुगु विषयस अनुसन्धान यायेगु जानकारी ब्यूगु दु । केसीं धाःगु दु, “अन मचातय्गु अवस्था दयनीय खनेदत, इमिगु सुनानं जिम्मा मकाःगु खनेदत । जिम्मा काइगु संस्था सीडिओ ज्याकुथिइ दर्ता जुयाच्वंगु नं खनेमदु । एब्युजया खँ नं वःगु दु, थ्व गम्भीर विषय खः ।”

मचातय्त ब्वंकेगु धकाm हःगु तर ब्वने मखंगु मचातसें धाःगु दु । संस्थाया रेकर्डय् १५ म्ह मचात दूगु खनेदुसां नं संस्थाय् ९ म्ह जक मचात लुयावःगु दु । मेपिं ६ म्ह मचातय्गु बारे मालेगु ज्या जुयाच्वंगु बालबालिका खोजतलास केन्द्रं जानकारी ब्यूगु दु ।

मचात तयेगु संस्थाया निश्चित मापदण्ड दुसां नं पालना मजूगु सीदूगु प्रहरी निरीक्षक केसीं धाःगु दु । द्वन्द्वपीडित अभिभावकया मचातय्त आखः ब्वंकेगु धकाः उपिं मचात हःगु सीदूगु दु ।

Categorized in दुर्घटना-अपराध