नेवा: अनलाइन न्युज | २०७६ आषाढ १०, मंगलबार १४:२९:४८

येँया टेकुइ पप्पु कन्स्ट्रक्सनं दयेकूगु न्हूगु तां (पुल) सवारीसाधन वयेवनेगुलि बन्द याःगु दु ।

तां गुणस्तरहीन जूगु धासें उकियात संचालनय् हयेमज्यूगु माग न्हापांनिसें हे वयाच्वंगु खः ।

परामर्शदातां संचालनया नितिं अयोग्य ठहर याःगु उगु पुलय् थ्यंमथ्यं दच्छि सवारीसाधन निर्वाध रुपं चलेजूगु खः । लिपांगुखुसिइ वयाः सवारी दुर्घटनाया जोखिम जुइफूगु धासें सरकारं बल्ल आः उगु पुल बन्द याःगु दु ।

विभागं संचालनय् रोक तःसां नं ट्राफिक प्रहरीं कडाई मयाःबलय् जोखिमपूर्ण रुपं उगु पुलं सवारी चलेजुयाच्वंगु खः । आः प्रहरीं हे पुलय् ल्वहँ तयाः सवारीसाधन वयेवनेगुलि बन्द याःगु खः ।

आःतक निर्माण कम्पनीपाखें उगु पुल सरकारयात हस्तान्तरण याःगु मदुनि । पुलय् गम्भीर लापरवाही लुयावयेधुंकाः परामर्शदातां हे पुल थुनेमाःगु रिपोर्ट लःल्हाःगु खः ।

सतक विभागया प्रवक्ता शिवहरि सापकोटां परामर्शदाता कम्पनीया रिपोर्ट कथं हे उगु पुल विभागं थःगु जिम्माय् मकयागु धाःगु दु ।

पुलय् गम्भीर लापरवाही व त्रुटि जूगु धायेधुंकाः उगु पुल विभागं बुझेयानाः कायेमफइगु अवस्थाय् थ्यंगु खः धकाः सापकोटां धाःगु दु ।

भौतिक पूर्वाधार व यातायातमन्त्री रघुवीर महासेठ धाःसा पुल थुनेगु पक्षय् मदु । वं सतक विभागयात टेकु पुलयात माःगु मर्मत यानाः संचालन यायेत निर्देशन ब्यूगु खः ।

तर, विभागया अधिकारीपिं धाःसा उगु पुलय् हाकनं रेट्रोफिट यानाः संचालन योग्य दयेकेमफइगु पक्षय् दु । उगु पुलय् स्पान दथुया अन्तर आपालं दु । उगु प्रि–स्ट्रेस प्रविधिइ दयेकूगु पुल जूगुलिं थुकी रेट्रोफिट यायेबलय् नं जोखिम म्हो यायेत थाकुइगु खनेदु ।

तर, मन्त्री महासेठं पुलयात बल्लाकाः संचालनया व्यवस्था यायेत विभागयात दबाब ब्यूगु खः । थ्यंमथ्यं २० करोड खर्च यानाः दयेकूगु निगुलि पुलय् थीथी प्राविधिक गल्ती जूगु दु ।

६० मिटर ताःहाकःगु पुल निर्माण क्वमचायेवं हे त्रुटि जुइधुंकाः दिगो शहरी यातायात आयोजनां पप्पु कन्स्ट्रक्सनयात थुनेत निर्देशन ब्यूगु खः । आयोजनाया प्राविधिक परामर्शयात बेवास्ता यानाः पुल जबरजस्ती थःगु हे कथं दयेकूगु दु ।

उगु पुलया पक्की आधार संरचना (प्रि–स्ट्रेस कंक्रिट ग्रिडर व केबलया ज्याकिङ)या निर्माण गुणस्तरहीन जूगु विभागया ठहर दु । आयोजनालिसे परामर्श व सल्लाह मयाःसे पुलया डेक स्ल्याब निर्माण याःगु दु ।

परामर्शदाता कम्पनीं उगु पुल ढलानया झ्वलय् तारया ज्याकिङ मिले हे मजूगु रिपोर्ट ब्यूगु दु । निर्माण हलंज्वलंतय्गु ल्याब टेस्ट याःगु मदु ।

तःक्वःमछि निर्देशन ब्यूसां नं निगुलिं पुलया ढलान जानकारी मब्यूसे चांचां याःगु विभागया अधिकारीपिन्सं धाःगु दु ।

पप्पु कन्स्ट्रक्सन आः पुल थुनेत माग यासें मध्यस्थता परिषद(डिस्प्युट बोर्ड)य् थ्यंकूगु दु । उगु पुल निर्माणया नितिं जुलाई २०१६ स क्वचाइगु कथं जून २०१४ स सम्झौता जूगु खः ।

इलय् हे ज्या मजुइधुंकाः डिसेम्बर २०१७ तक म्याद थप याःगु खः । तर, लिपा लाकाः निर्माण याःगु पुल नं गुणस्तरीय मजुइधुंकाः बन्द यानाः तयेमाःगु अवस्था वःगु दु ।

Categorized in राष्ट्रिय