नेवा: अनलाइन न्युज – निश्चल | २०७६ आषाढ २४, मंगलबार २२:५७:०१

 नेपालभाषा मंकाः खलः, यलया ग्वसालय् व यल महानगरपालिकाया आर्थिक ग्वाहालिइ नेपाल लिपि, साहित्य व संस्कृतिया प्रशिक्षण क्वचाःगु दु । नेसं ११३९ तछलागा तृतिया (असार ५) निसें दिल्लाथ्व सप्तमी (असार २४) तक नीन्हुतक १६ म्ह विद्यार्थीपिंत नेपाल लिपि, नेपालभाषाया साहित्य व संस्कृतिबारे प्रशिक्षण ब्यूगु खः । प्रशिक्षणलिपा असार २५ खुनु छगू ज्याझ्वःयादथुइ प्रशिक्षार्थीपिंत दसिपौ लःल्हाःगु दु ।

यल महानगरपालिका, सामाजिक विकास समितिया संयोजक दिनेश कार्की मू पाहां जुयादीगु समापन ज्याझ्वलय् यल महानगरपालिका समाज कल्याण महाशाखा प्रमुख बाबुराजा महर्जन व यल २७ वडाया वडाध्यक्ष बाबुराज महर्जनपिं पाहांकथं झायादीगु खः । नेपालभाषा मंकाः खलः यलया नायः ऋषिप्रसाद श्रेष्ठया सभापतित्वय् ज्याझ्वः क्वचाःगु खः । यलया नेपालभाषा मंकाः खलःया ज्याकुथिइ जूगु प्रशिक्षण ज्याझ्वःया मू संयोजक सहप्रा तुल्सीलाल सिं जुयादीगु खःसा राकेश महर्जन व किरण शाक्यपिंसं प्रशिक्षण बियादीगु खः ।

एलिना महर्जन, शक्ति महर्जन, नवीन महर्जन, रमिता महर्जन, राजेन्द्र महर्जन, रोजी महर्जन, न्हुच्छेलाल महर्जन, न्हुच्छेबहादुर महर्जन, न्हुच्छेलाल महर्जन, पुनु अवाले, अमीरचन्द्र महर्जन, शैलेश प्रधान, ज्ञानी महर्जन, निशा प्रधान (सिक्किम), बेखा ताम्राकार व ज्ञानबहादुर महर्जनपिंसं प्रशिक्षणय् ब्वति कयादीगु खः ।

Categorized in नेवाः