chetrapa55

यलया गोदावरीइ सतक विस्तार ः एक्स्काभेटर चालकयात आक्रमण

नेवा: अनलाइन न्युज | २०७६ मङ्सिर १८, बुधबार १५:५४:२०

सतक विस्तारया ज्या यानाच्वंबलय् यलया गोदावरीइ एक्स्काभेटर चालकयात दाःगु दु । गोदावरीचौरं हरिसिद्धिपाखे ३ किलोमिटर सतक खण्डया ठेक्का काःगु लामा–समानान्तर जेभीया एक्स्काभेटर चालक सन्तोष कोइरालायात दाःगु खः ।

सतक विस्तार पीडित संघर्ष समितिया नामय् वःगु पुचलं एक्स्काभेटरलिसे चालकयात नं अप्पा व ल्वहँतं क्यकूगु व दायेधुंकाः सतक विस्तारया ज्या रोक्का जूगु खः । चालकयात सांघातिक आक्रमण याःगु धासें निर्माण कम्पनीं जिल्ला प्रशासन ज्याकुथियाके सुरक्षा माग याःगु दु ।

आक्रमणपाखें घाःपाः जूम्ह एक्स्काभेटर चालकया ल्हाः त्वःधूगु दु । वयात मेडिसिटी अस्पतालय् वासः यायेगु नितिं यंकूगु खःसा थप वासः यायेगु नितिं बीएण्डबी यंकूगु समानान्तर जेभीया अच्युट खरेलं धाःगु दु ।

खरेलं धाःगु दु, “जिमिसं ३ किलोमिटर खण्डया ४ महिनाय् क्वचाइगु ज्या तःक्वःमछि थथेहे पंगःया हुनिं यायेमफुगु खः । आः कामदारपिन्त हे आक्रमण जुइधुंकाः ज्या यायेगु लकस झन स्यंगु दु ।”

सरकारं व्यवसायीं ज्या मयात धकाः पेलेयानाच्वंगु इलय् थःपिन्त ज्या यायेगु थासय् हे वनेत समस्या जूगु खरेलं धाःगु दु । प्रशासनं सुरक्षाया पूर्ण प्रत्याभूति बिया व स्थानीयं ग्वाहालि याःसा ४ महिनाय् ज्या क्वचायेकाः क्यनेगु खरेलं धाःगु दु ।

सरकारं २२ मिटरय् विस्तार यायेगु धाःगु उगु हरिसिद्धि–गोदावरी सतक स्थानीयया विरोध लिपा १६ मिटर जक विस्तार यायेगु निर्णय जूगु दु । वहे कथं ज्या न्ह्यःने यंकूसां नं स्थानीयं पंगः थनाः समसया जूगु सतक विभागया महानिर्देशक केशवकुमार शर्मां धाःगु दु ।

शर्मां धाःगु दु, “गुबलें जिमिसं ज्यायात गति बिया, उबले थुज्वःगु कथंया घटना जुइ । सतक विस्तारया ज्याय् स्थानीयं ग्वाहालि याःसां नं संघर्ष समितिया नामय् मेमेगु पुचलं अप्वः पंगः थनीगु यानाच्वंगु दु । ”

वं जनताया जायज मागयात सरकारं सम्बोधन यायेधुंकूगु अवस्थाय् विस्तारया ज्याय् पंगः मथनेत आग्रह याःगु दु ।
येँय् न्ह्यःने यंकेमफुगु आपाल. विस्तारया आयोजनाय् पंगः चीका ज्या न्ह्याकेधुंकूगुलिं फुक्कस्यां ग्वाहालि यायेमाःगु महानिर्देशक शर्माया धापू दु ।

Categorized in राजनीति