telecom 18 kartik 2076

यलम्बरं स्वल येँयाः इन्द्रजात्रा

इन्द्रचोकय् सजेयानाः तयातःम्ह आकाशभैरवयात किराँतवंशी न्हापांम्ह जुजु यलम्बरया अवशेषया रुपं कयातःगु दु ।

येँया नेवाः समुदायया तःधंगु जात्रा येँयाः इन्द्रजात्रा आःतक नं क्वचाःगु मदुनि । रथयात्रा, लाखेप्याखं न्ह्यानाच्वंगु दु । येँयाः सुरु जुसांनिसें क्वमचाःतलेतक थीथी द्यःपिं व भैरवया मूर्ति पिकायातःगु दु । जात्रा ज्वःछिया निति. मूलछेँपाखें पिकाःगु मूर्तियात न्हिथं पूजापाठ याइगु खः ।

बसन्तपुर जःखः समाः यानातःगु मूर्तिमध्ये आकाशभैरव नं छम्ह खः । इन्द्रचोकय् सजेयानाः तयातःम्ह आकाशभैरवयात किराँतवंशी न्हापांम्ह जुजु यलम्बरया अवशेषया रुपं कयातःगु दु ।

गुन्हुतक भैरवया मूर्तियात पिने तयेगु याइ । एकादसिया दिं आकाशभैरवया मूर्ति तयेगु खः तयार यानाः द्वादसिया दिनय् भैरवया मूर्ति सुचुपिचु यानाः पिने हइगु खः । द्वादसिया दिंनिसें पिने हःगु भैरवया मूर्ति छक्वलं झिन्हुया दिं अर्थात् कृष्ण चतुर्थीया दिनय् जक मूलस्थानय् यंकीगु आकाशभैरव गुथिया नायः शरदकुमार डंगोलं जानकारी ब्यूगु दु ।

नायः डंगोलया कथं १० न्हुतक थीथी विधिपाखें भैरवया पूजा जुइगु खः । अथेहे विधिकथं शनिवाः अर्थात् पुन्हीया दिनय् साइत कथं भैरवया म्हुतुं न्याम्ह म्वाःपिं न्याँ चुइकाः छ्वःगु खः । न्याँ चुइकाः छ्वयेगु दिनय् रथयात्रा थःनेपाखे जुइ । थःने त्वालय् रथयात्रा याइगु लँपुइ इन्द्रचोक नं लाः ।

भैरवया म्हुतुं ताःहाकःगु जाल दयेकाः जालय् थ्वँ तयाः न्याँ चुइकेगु याइगु खः । मूर्ति तयातःगु खः क्वय् लाःगु पातालपुरय् अय्लाःलिसें न्याँ चुइकेगुु विधि क्वचायेधुंकुगु दु । भैरवया मूर्तिइ थ्वँ छायेगु ज्या जुइ तर श्वेत भैरवया मूर्तिपाखें धाःसा थ्वँ हे हायेकाः दर्शनार्थीपिन्त त्वंकेगु याइ ।

न्याँ चुइकेगु इलय् भैरवया मूर्तिइ स्वां दइमखु तर रथयात्राया झ्वलय् स्वां हे स्वां नं त्वःपुयातःगु दइ । भैरवयात थीथी प्रजाति व रंगया स्वां नं समाः यानातयेगु याइ ।

न्हापान्हापा स्वां आपालं दइगु खः तर थौंकन्हय् स्वां मालेत थाकूगु नायः डंगोलं धाःगु दु । वय्कःया कथं थःथितिपिन्सं हःगु स्वांपाखें भैरवया मूर्तिइ समाः यायेगु याइ ।

न्हियान्हिथं ब्यागलं ब्यागलं स्वांपाखें मूर्ति समाः यायेमाः । छन्हु मूर्तिइ तःगु स्वां मेगु दिंया नितिं छ्यलाबुला यायेमज्यू ।

भैरव गुथिइ दुपिं ६२ म्हमध्येय् प्रत्येक दँ जुइगु जात्रापर्वया नितिं च्याम्ह च्याम्हेसिगु जिम्मेवारी दइ । पिने पिकयातःम्ह भैरवया मूर्तिइ न्हिथं परम्परा कथं पूजाआजा याइ । विधि व ईकथं सुथय्, न्हिनय् व बहनी यानाः स्वक्वःतक मूर्तिइ पूजाआजा याइ ।

यलम्बर व कृष्णया सम्बन्ध किंवदन्तीकथं इन्द्रचोकय् च्वंगु आकाशभैरवयात स्वनिगःया किराँतवंशी जुजु यलम्बरया अवशेषया रुपं कयातःगु दु । भैरवयात महाद्यःया रुद्र रुपय् तकं मानेयायेगु यानाः वयाच्वंगु दु ।

गुथिया नायः डंगोलया कथं यलम्बर व महाभारत युद्धया तकं स्वापू दूगु धयाः वयाच्वंगु दु । यलम्बर अर्थात् भैरव महाद्यःया रुद्र रुप कयाः महभारत युद्ध स्वयेत थः सेना व गणलिसें कुरुक्षेत्र थ्यंकूगु खः । कुरुक्षेत्र वनेगु झ्वलय् यलम्बरं कृष्णयात नापलात । कृष्णलिसे नापलायेधुंकाः यलम्बरं महाभारत युद्ध जुयाच्वंगुलिं स्वःवनेत्यनागु खँ धाल ।

कृष्णं महाभारतया युद्ध यायेगु खँ परिकल्पना जक याःगु खः । यलम्बरया खँ न्यनाः अजूचायाः युद्धय् सुयागु पक्षय् समर्थन यायेगु धकाः न्यन । यलम्बरं युद्ध बूम्हेसिगु पक्षय् समर्थन जुइगु धाल । युद्धय् पाण्डवयात त्याकेगु कल्पना याःम्ह कृष्णयात कौरवं बूसा व यलम्बरं थः सैनिकलिसें युद्धय् सहभागी जूसा अनर्थ जुइगु धासें पनेगु योजना दयेकल ।

यलम्बरयात पनेगु योजना दयेकाः कृष्णं छल यात । छल यायेगु झ्वलय् कृष्णं यलम्बरलिसे कासा म्हितूबलय् ‘छ ला अतिकं बल्लाःम्ह बलवान जुयाच्वन । जिं छन्त बरदान बिइ’ धाल । यलम्बरं अःखतं ‘जिं छन्त बरदान बिइ, फ्वं’ धाल । कृष्णं सोचेयाःथें जुइधुंकाः लसता पिज्वयेकाः यलम्बरयाके ‘जिं छंगु छ्यं पालेदयेमा’ धकाः वर फ्वन । वाचाय् बूम्ह यलम्बरं कृष्णयात युद्ध स्वयेदइगु कथं बरदान बिल । कृष्णं यलम्बरया छ्यं आकाशय् यःखानाः युद्ध स्वके बिल ।

युद्ध क्वचायेधुंकाः वहे छ्यं येँय् वयाच्वंगु व आकाशभैरव रुपय् विराजमान जूगु कथं कयातःगु दु ।

विधिवत् रुपं वंगु यँलाथ्व द्वादसि (भाद्र २४ गते) मंगलवाः हनुमानध्वाखय् च्वंगु तलेजुया देगःया न्ह्यःने च्वंगु कालभैरवया देगः लिक्क यःसिं थनेधुंकाः विधिवत् रुपं जात्रा न्ह्याःगु खः ।

जात्राया प्यन्हुया दिंयात मू दिंया रुपं तकं कायेगु याइगु खः । इन्द्रजाधा व्यवस्थापन समितिया नायः गौतम शाक्यया कथं जात्राय् थीथी २९ गु गुथिया सहकार्य जुयाः वयाच्वंगु दु ।

बसन्तपुर व जःखःया क्षेत्रय् कुमारी, गणेश, भैरव, लाखे, हल्चो भैरव, आकाश भैरव, पुलुकिसी, लाखेप्याखं, श्वेत भैरव, स्वच्छन्द भैरव, अशोक विनायक, दाँगी, किसिचा, कुमारी द्यः, महाकाली लिसेंया गुथिं इन्द्रजात्रा व्यवस्थापन याइ ।