ad 2076 5 18

यःसिं थन, येँयाः न्ह्यात येँ

नेवा: अनलाइन न्युज | २०७६ भाद्र २४, मंगलबार १५:४२:११

येँयाः पुन्ही (इन्द्रजात्रा) या लसताय् येँया हनुमानध्वाखया कालभैरव न्ह्यःने परम्परा कथं विधिपूर्वक यःसिं (इन्द्रध्वज) थंगु दु ।

ञँलाथ्व भाद्रशुक्ल द्वादसि थौंनिसें यःसिं थनाः विधिवत रुपं येँयाः (इन्द्रजात्रा) न्ह्याःगु दु ।

ञँलाथ्व अस्तमिया दिं येँया भोताहितिं यःसिं सालाः तलेजु देगः न्ह्यःने सिंध्वाखाय् तयेहःगु खः । थौं उगु हे यःसिं सुथय् ९ः१५ ता ईया साइतय् धंकूगु खः । थुकथं यःसिं थनेगु भाला परम्परांनिसें सायमि समुदायं यानाः वयाच्वंगु खः ।

थौं ञँलाथ्व द्वादसिनिसें हे यःसिंया क्वय् चीधंगु नंया खोरय् ऐरावत किसि म्हय् च्वनाच्वंम्ह स्वर्गया जुजु देवराज इन्द्रयात नं ब्वज्या याःगु दु ।

किंवदन्ती कथं इन्द्रया मां नं ञँलागा तृतीयाया दिं बसुन्धरादेवीया व्रत च्वनेत नेपालमण्डलय् ‘पालिजा स्वाँ’ व छिक्छिक बुँ कयाः वाः धकाः काय् इन्द्रयात ज्या वात । मांया इनाप कथं इन्द्रं नेपालमण्डलय् च्वंगु मरुहितिया पश्चिमपाखे छखा छेँया स्वांक्यबय् छेँ थुवाःयाके मन्यंसे पालिजा स्वां खुया: यंकेत्यंबलय् ञँलाथ्व द्वादसि थौंया दिं उपाकु यात्राय् वनाच्वंपिं मनूतसें इन्द्रयात खुँ धकाः ज्वनाः तान्त्रिक विधिपाखें पंचसूत्रं चिनाः सजाय ब्यूगु खः । काय् ताःईतक नं लिहाँ मवःगु जुयाः इन्द्रया मां स्वयं मत्र्यलोक अर्थात् नेपालमण्डलय् वल । येँय् वा पाकेयायेत हुस्सु छ्वयाहयेगु व पितृपिन्त स्वर्ग यंकाः तरेयायेगु बचंया शर्तय् इन्द्रयात मुक्त याःगु खः ।

इन्द्रजात्राया प्रारम्भलिसें नेपालमण्डलया छुं चुक व गल्लीया लिसें यःसिं थनातःगु थाय् व मरुसतः (काष्ठमण्डप)या जःखः, वंघलय् उच्च थासय् फुक्कसिनं खनीगु कथं इन्द्रयात पंचसूत्रं चिनाः खोर दुने कैद यानाः ब्वयातयेगु प्रचलन दु ।

येँय् येँयाः अर्थात् इन्द्रजात्रा न्ह्यायेखतं कुमारी, गणेद्यः व भैरवया रथयात्रा, मजिपाःया रंजित समुदायपाखें लाखे व झ्यालिंचा प्याखं, सवभक्कु प्याखं, पुलुकिसि प्याखं नं क्यनेगु याइ ।

देसया थीथी पर्व व जात्रामध्ये इन्द्र जात्रा अर्थात् येँयाः बुरापाकानिसें मचाखाचातक सकलसिनं न्ह्याइपुक्क न्यायेकीगु जात्राया रुपं धस्वानाच्वंगु दु ।

यःसिं थनेगु जात्रा अर्थात् इन्द्रध्वजोत्थान स्वयेत हनुमानध्वाखा जःखः तःधंगु ल्याखय् मनूतयेगु भीड जूगु खः । उगु ज्याझ्वलय् जुजु पृथ्वीनारायण शाहया पालंनिसें न्ह्यानाच्वंगु गुरुजुया पल्टनं तोप मुइकेगु लिसें थीथी धून थायेगु याःगु खः ।

Categorized in नेवाः