telecom 18 kartik 2076

मैतीदेवी देगःया जग्गा नर्सरीं मिचेयात

नेवा: अनलाइन न्युज | २०७६ आश्विन ३०, बिहिबार १६:२९:२०

ऐतिहासिक, पुरातात्विक, धार्मिक व सांस्कृतिक ल्याखं महत्वं जाःगु येँया मैतीदेवी देगःया थ्यंमथ्यं १ रोपनी जग्गा जःखःपाखें मिचेयाःगु दु ।

पशुपतिनाथ देगःथें हे पुलांगु ऐतिहासिक महत्वं जाःगु मैतीदेवी देगः क्षेत्र जःखलं मिचेयाःगु तब्यागु थाय् आः चीब्या जुजुं वंगुलिं स्थानीय बासिन्दापिन्सं च्यूताः प्वंकूगु दु ।

देगः क्षेत्रय् दूगु १४ रोपनी जग्गामध्ये २०५७ सालय् ३ रोपन िजग्गा नर्सरीयात ब्यूगु खः । वडा ज्याकुथिं नर्सरी संचालन यायेत जग्गा बिइधुंकाः देगः क्षेत्र अस्तव्यस्त जूगु दर्शनार्थीपिन्सं धाःगु दु ।

देगःया जग्गापाखे. नर्सरी चीकेत पहल जुयाच्वंगु मैतीदेवी देगः क्षेत्र प्रबन्ध समितिं जानकारी ब्यूगु दु । स्थानीय तहलय् निर्वाचित जनप्रतिनिधि मदुबलय् शहरी विकास व भवन निर्माण विभागं क्वःछ्यूगु कर्मचारी संयन्त्रं देगः संचालन याःगु खः । आः येँ महानगरपालिका–३० वडा नायःया अध्यक्षताय् देगः क्षेत्र प्रबन्ध समिति नीस्वंगु दु ।

समितिं देगः क्षेत्रयात सुन्दर व आकर्षक दयेकेत थीथी ज्याझ्वः दयेकेत्यंगु नायः दलबहादुर कार्कीं धाःगु दु । घनाः बस्तीया दथुइ दूगु धार्मिक आस्थाया केन्द्रयात व्यवस्थित यानाः आन्तरिक व वाह्य पर्यटक आकर्षित यायेगु वडाया योजना दु ।

देगः व्यवस्थित यायेत संचालन निर्देशिका मस्यौदा यानाः येँ महानगरपालिका कार्यपालिकाय् पेश यानागु समितिया दुजः विश्वराज रेग्मीं धाःगु दु ।

नगर कार्यपालिकां निर्देशिका पारित यायेधुंकाः नर्सरीयात चिइकाः देगः क्षेत्र थप आकर्षक व व्यवस्थित यायेत्यंगु खः । मैतीदेवी देगः न्ह्यःनेया धर्मशाला प्यदँ न्ह्यः २०७२ बैशाखया भुखाचं ध्वस्पत जुइधुंकाः आःतक नं पुनःनिर्माण याःगु मदुनि ।

पशुपतिनाथय् किपुलिं वःम्ह सां दुरु हायेकेधुंकाः म्हुयाः स्वःबलय् तःग्वःगु ल्वहँ लुयावःगु खः । ल्वहँयात पां पाःबालय् स्वंगू कुचा जुल । छगू कुचा आःया पशुपतिनाथ देगलय् हे खः । मेगु कुचा ज्ञानेश्वरया महाद्यःया देगलय् दुसा मेगु कुचा मैतीदेवी देगः निर्माण जूगु किंवदन्ती प्रचलित जुयाच्वंगु दु ।

पशुपतिनाथ देगःया तुलनाय् मैतीदेवी ज्ञानेश्वरया महाद्यःया देगः तनाः वनाच्वंगु स्थानीय बासिन्दापिन्सं धाःगु दु ।

Categorized in स्थानिय-समाज