chetrapa55

मेस्सीया ह्याट्रिकं बार्सिलोना त्यात

नेवा: अनलाइन न्युज | २०७६ मङ्सिर २२, आइतबार १०:५९:०२

लिओनल मेस्सी. ३५ क्वःगु ह्याट्रिक याःबलय् बार्सिलोनां मालोर्कायात बुकाः हाकनं शीर्ष थासय् थाहां वंगु दु । वंगु चान्हय् म्हितूगु कासाय् मेस्सीया ह्याट्रिक प्रेरित बार्सिलोनां मालोर्कायात ५–२ गोल अन्तरं बुकूगु खः ।

ला लिगाय् सर्वाधिक ह्याट्रिक याःम्हेसित मेस्सीं रोनाल्डोयात ल्यूने लाकूगु दु । रोनाल्डोया ३४ ह्याट्रिक जूगु दु ।

घरेलु मैदान नोउ क्याम्पय् कासा न्ह्यः मेस्सीं छुं दिं न्ह्यः जक त्याकूगु खुक्वःगु बालोन डे ओर अवार्ड क्यंगु खः । वधुंकाः वं ह्याट्रिक हे यानाबिल ।

कसाया ७ औं मिनेटय् हे एन्टोनी ग्रिजमनया गोलं बार्सिलोनां अग्रता काःगु खः । मेस्सीं १७ औं मिनेटय् ग्रिजमनया हे पासय् गोल यासें अग्रता दोब्बर याःगु खः । ३५ औं मिनेटय् मालोर्काया नितिं एन्टे बुडिमिरं गोल याःगु खः । ४१ औं मिनेटय् मेस्सीं व्यक्तिगत निगूगु व ४३ औं मिनेटय् लुइस लुइस सुअरजें न्हापांगु गोल यायेधुंकाः बार्सिलोना न्हापांगु हाफय् हे ४–१ गोल अन्तरं न्ह्यःने लाःगु खः ।

एन्टे बुडिमिमरं हे ६४ औं मिनेटय् व्यक्तिगत निगूगु गोल यायेधुंकाः कासा ४–२ गोल अन्तरया अवस्थाय् थ्यंगु खः । मेस्सीं ८३ औं मिनेटय् गोल यासें ह्याट्रिक पूवंकाः बार्सिलोनाया जीत सुनिश्चित याःगु खः ।

त्याये धुंकाः बार्सिलोना १५ कासापाखे. ३४ ल्याः मुंकाः शीर्ष थासय् च्वंगु दु । समान कासापाखें ३४ ल्याः हे जूसां नं रियल मड्रिड गोल अन्तरय् ल्यूने लाःगु दु । रियलं शनिवाः जूगु कासाय् स्पानयोलयात २–० गोल अन्तरं बुकूगु खः ।

Categorized in कासा