nepal lifef 2076 8 8

मूल्य वृद्धि : स्वनिगल् दच्छिया दुने दोब्बरं थाहां वन

नेवा: अनलाइन न्युज | २०७६ मङ्सिर ६, शुक्रबार १२:४४:०१

मूल्य वृद्धियात नियन्त्रणय् तयेत सरकारी तवरं व्यापक अनुगमन थौंया आवश्यकता –अर्थविद् डा. अधिकारी

चालु आर्थिक दँया न्हापांगु त्रैमासय् स्वनिगःया मूल्य वृद्धि ८ प्रतिशत पार याःगु दु । न्हापांगु आर्थिक दँ ०७५–०७६ या न्हापांगु त्रैमासय् ४ प्रतिशत जूगु मूल्य वृद्धि थाहां वनाः दच्छिया दुने हे ८ प्रतिशत पार जूगु खः ।

नेपाल राष्ट्र बैंकया कथं, असोज मसान्ततकया उपभोक्ता मुद्रास्फिति स्वनिगलय् ८.१४ प्रतिशत थ्यंगु खः । कार्तिकतक स्वनिगलय् ८.१४ प्रतिशत, तराईलय् ५.७५ प्रतिशत, पहाडय् ४.८९ प्रतिशत व हिमालय् ५.११ प्रतिशत मुद्रास्फिति जूगु राष्ट्र बैंकं जानकारी ब्यूगु दु ।

दच्छि न्ह्यः २०७५ असोज महिनाय् उपभोक्ता मुद्रास्फिति स्वनिगलय् ४.० प्रतिशत, तराईलय् ४.३ प्रतिशत, पहाडय् ६.१ प्रतिशत व हिमालय् ४.२ प्रतिशत जूगु खः ।

औसतय् तकं उपभोक्ता मुद्रास्फिति ६.२१ प्रतिशत जूगु दु । न्हापांगु दँया वहे महिनाय् थुज्वःगु मुद्रास्फिति ४.६८ प्रतिशत जूगु खः । समीक्षा महिनाय् खाद्य व पेय पदार्थ समूहया मुद्रास्फिति ७.०४ प्रतिशत व गैर खाद्य वव सेवा समूहया मुद्रास्फिति ५.५५ प्रतिशत जूगु दु ।

थ्व अवधिइ खाद्य व पेय पदार्थ समूह अन्तर्गत मुख्यतः तरकारी, ला व न्याँ, सिसाबुसा व मसला उपसमूहया मूल्य वृद्धि जूगु राष्ट्र बैंकं जानकारी ब्यूगु दु ।

गैर खाद्य व सेवा समूह अन्तर्गत मुख्यतः घरायसी छ्यलाबुलाया वस्तु व सेवा, कापः व लाकां लिसें शिक्षा उपसमूहया मूल्य थाहां वंगु राष्ट्र बैंकं जानकारी ब्यूगु दु ।

अनुगमन मयाःगुया प्रतिफल : अर्थविद् डा.चन्द्रमणि अधिकारी

स्वनिगःया मूल्य वृद्धि निरन्तर रुपं थाहां वंगुया छगू मू कारण फितलो अनुगमन जूगु अर्थविद् डा. चन्द्रमणि अधिकारीं धाःगु दु । स्वनिगलय् वस्तुत उत्पादन मजूगु व पिनेपाखें हयाः मिइगु जूगुलिं हलंज्वलंया नं अनुगमन मजुयाः स्वनिगःया मूल्य वृद्धि निरन्तर रुपं थाहां वनाच्वंगु अर्थविद् अधिकारीया धापू दु ।

अर्थविद् अधिकारीं धाःगु दु, ‘स्वनिगःया जक लिपांगु इलय् ८ प्रतिशत प्लस जुइधुंकूगु दु, ट्रान्सपोर्टेशन कष्ट अप्वः तुइगु जुगुलि. हिमाल व पहाडय् अप्वः थाहां वनेगु माःगु खः तर अःखः जुल । पहाड व हिमालय् छुं आन्तरिक उत्पादनं थुज्वःगु जूगु जुइमाः, स्वनिगलय् ला छुं उत्पादन हे मजुइगु जुइधुंकल ।’

बजार अनुगमनयात सरकारं विशेष ध्यान मब्यूसा मूल्य वृद्धि भयावह जुइफइगु डा. अधिकारीं धाःगु दु । मूल्य वृद्धियात नियन्त्रणय् तयेत सरकारी तवरं व्यापक अनुगमन थौंया आवश्यकता जूगु अर्थविद् डा. अधिकारीं धाःगु दु ।

Categorized in बजाः