telecom 18 kartik 2076

मिसामचा बलात्कार याःपिं ७ म्ह गिरफ्तार

नेवा: अनलाइन न्युज | २०७६ कार्तिक १, शुक्रबार ११:५५:२१

वीरेन्द्रनगरया १३ दँया मिसामचायात सामूहिक बलात्कार याःगु द्वपनय् प्रहरीं ७ म्हेसित गिरफ्तार याःगु दु ।

गिरफ्तारीइ लाःपिं वीरेन्द्रनगर नगरपालिका–३ या २३ दँया लालबहादुर रावत, १९  दँया महेश हमाल, १९ दँया तर्क रिजाल, १८ दँया सुदीप खड्का, वडा नं ४ या २३ दँया धनबहादुर खत्री, बराहताल गाउँपालिका–२ या २३ दँया रोशन वली व २१ दँया नरेश बुढा जूगु जिल्ला प्रहरी ज्याकुथिया प्रवक्ता प्रहरी नायब उपरीक्षक रवि रावलं जानकारी ब्यूगु दु ।

पीडित मिसामचां आइतवाः ब्यूगु जाहेरीया आधारय् प्रहरीं बलात्कारीया द्वपं लाःपिं ७ म्हेसित गिरफ्तार यानाः अनुसन्धान न्ह्याकूगु दु । जिल्ला प्रहरी ज्याकुथिं ७ म्हेसित हिरासतय् तयाः अनुसन्धान यायेत जिल्ला अदालतं १० न्हुया नितिं म्याद थप यायेधुंकूगु दु ।

पीडित मिसामचां प्रहरीयात ब्यूगु जाहेरीइ थःत इमिसं पालंपाः असोज १५, १६ व २३ गते छक्वः प्यम्हेसिन व मेगु पालय् निम्हेस्यां बलात्कार याःगु न्ह्यथंगु दु । जाहेरी लायेखतं माःगु प्रमाण मुंकेगु व बलात्कारीपिन्त ज्वनाः अनुसन्धान न्ह्याकूगु प्रनाउ रवि रावलं धाःगु दु ।

Categorized in दुर्घटना-अपराध