ad 2076 5 18

मिँ च्यात रेडियो पर्वतय्, प्रसारण बन्द

नेवा: अनलाइन न्युज | २०७६ जेठ २९, बुधबार ०९:२०:१६

पर्वत जिल्लाया सामुदायिक रेडियो ‘रेडियो पर्वत’य् वंगु चान्हय् मिँ च्याःगु दु ।

चान्हय् १ ता इलय् विद्युत चुहावट जुया मिँ च्याःगु खःसा मिँ च्यानाः रेडियोया ट्रान्समिटर, ७गः कम्प्युटर, निगः मिक्स्चर हाइब्रिड टेलिभिजन लिसेंया हलंज्वलंत पूर्णरुपं नष्ट जूगु रेडियोया स्टेशन म्यानेजर शंकर शर्मां जानकारी ब्यूगु दु ।

मिँ च्यायेधुंकाः सुथंनिसें रेडियोया प्रसारण तकं बन्द जूगु दु । छुं नं हलंज्वलं ज्याख्यलय् मजूगुलिं बन्द यायेगुया विकल्प मदूगु शर्मां धाःगु दु । वय्कःया कथं मिँ च्यायेधुंकाः स्थानीयबासी व प्रहरीया सक्रियताय् चान्हय् २ ता इलय् मिँ नियन्त्रणय् काःगु खः ।

विद्युत जडान यानातःगु स्वीचय् समस्या वःगु हुनिं पूर्णरुपं क्षति जूगु खः । मिँ च्याःगुपाखें रेडियो संचालित छेँया स्वंगू कोथाय् तकं क्षति जूगु दु । थ्यंमथ्यं ३० लख तकासिबें अप्वःया क्षति जूसां नं पायछि विवरण धाःसा मवःनिगु शर्मां जानकारी ब्यूगु दु ।

तत्काल वाःचायेकेफूगुलिं छुं नं मानवीय क्षति धाःसा मजूगु स्थानीय प्रहरीं जानकारी ब्यूगु दु ।

२०६४ निसें ग्रामीण क्षेत्र फलेवासपाखें प्रसारण जुयावयाच्वंगु रेडियो पर्वत उगु क्षेत्रया न्हापांगु सामुदायिक रेडियो खः ।

Categorized in दुर्घटना-अपराध