नेवा: अनलाइन न्युज | २०७६ श्रावण २१, मंगलबार ११:४०:२७

माउण्टेन टिभी येँय् ज्या यानाच्वंम्ह पत्रकार शालिकराम पुडासैनी सिनाच्वंगु अवस्थाय् लुयावःगु दु ।

चितवनया नारायणगढया बसपार्कय् च्वंगु कंगारु होटलय् सिनाच्वंगु अवस्थाय् पत्रकार पुडासैनी लुयावःगु खः ।

पत्रकार पुडासैनी सोमवाः न्हिनय् ३ः३० ता इलय् उगु होटलया २०२ नम्बर कोथाय् बास च्वंगु खः । जा नयेत सःतेत होटलया कर्मचारी थ्यंकूबलय् कोथा दुनेपाखें हे बन्द यानातःगु व खापा मचायेकूबलय् बहनी १० ता इलय् प्रहरीयात खबर याःगु खः ।

प्रहरीया रोहबरय् खापा चाःबलय् पत्रकार पुडासैनी यःगानाच्वंगु अवस्थाय् लुयावःगु चितवन प्रहरीं जानकारी ब्यूगु दु ।

नुवाकोटया बेलकोटगढी नगरपालिका वडा नम्बर २ छेँ दुम्ह पत्रकार पुडासैनी नकतिनि जक माउण्टेन टिभीइ दुहाँ वंगु खः । उगु टेलिभिजनय् पत्रकार पुडासैनीं मिसन न्यूज ज्याझ्वः न्ह्याकाः वयाच्वंगु खः ।

थ्वसिबें न्ह्यः वय्कः न्यूज २४ या ‘सिधा कुरा जनतासंग’ ज्याझ्वलय् तकं ज्या यानादीम्ह खः । वय्कःया थःथितिपिं वयेधुंकाः घटनाबारे थप अनुसन्धान जुइगु चितवन प्रहरीं जानकारी ब्यूगु दु ।

Categorized in राष्ट्रिय