ad 2076 5 18

महाकाली प्याखं बसन्तपुरय्

नेवा: अनलाइन न्युज | २०७६ भाद्र २५, बुधबार १३:५०:१०

येँया बसन्तपुरय् येँयाःया यःसिं थनेधु.काः असत्ययात सत्यं त्याकुगु प्रतीक कथं नवरसं जाःगु महाकाली लिसें थीथी द्यःपिनिगु प्याखं क्यनेगु ज्या न्ह्याःगु दु । थ्व प्याखं च्यान्हुतक न्हिथं सनिलय् क्यनीगु प्याखं खः ।

येँयाःया झ्वलय् कुमारी, गणेद्यः व भैरवयात स्वन्हु सहर परिक्रमा याकी । व, उगु स्वन्हु सलंस दँ पुलांगु महाकाली प्याखं नं क्यनेगु याइ ।

ख्वपया महाकाली प्याखं लगायतया पुचलं येँया बसन्तपुरय् महाकाली प्याखं क्यनेगु याइ । ख्वपया महाकाली प्याखं पुरातत्व विभागय् तकं दर्ता जुयाच्वंगु दु धकाः संस्कृतिविद् ओम धौभडेलं धाःगु दु ।

येँयाः सायाः व मोहनीया नवमीइ यानाः दँय् स्वन्हु महाकाली प्याखं क्यनेगु चलन दु । महाकाली प्याखं थ्यंमथ्यं निघौतक क्यनेगु याइ । महाकाली प्याखं नौबाजा व नौरसय् ल्हुइगु याइ । थुकी थीथी द्यःपिनिगु नं प्याखं जुइ । तर मू आकर्षण महाकालीया जुइ । प्याखनय् द्यःपिनिगु भूमिका पुस्तौंनिसें मिजंपिन्सं म्हिताः वयाच्वंगु दु ।

थ्व महाकाली प्याखं गुबलेनिसें न्ह्यात धैगु आधिकारिक अभिलेख मदु । तर लिच्छविकालनिसें न्ह्याःगु व मल्लकालनिसें व्यवस्थित याःगु धायेगु याः । संस्कृतिविद् ओम धौभडेलया कथं महाकाली प्याखंया सम्बन्ध नरदेवी प्याखंलिसे दु ।

राणाकालीन इलय् महाकाली प्याख. चर्चाय् वःगु खः । तत्कालीन प्रधानमन्त्री जंगबहादुर राणां येँया राजकीय पर्व कथं कयातःगु येँयाः पुन्ही अर्थात् इन्द्रजात्राय् थ्व प्याखं क्यनेगु न्ह्याकूगु धापू दु ।

Categorized in स्थानिय-समाज