nepal lifef 2076 8 8

मन्त्री पद मन्त, ग्यानापुगु खँ पितहल

नेवा: अनलाइन न्युज | २०७६ मङ्सिर १०, मंगलबार १२:४६:१८

नेकपाया सरकारं २० महिना ई फूसां तकं जनतां अनुभूति यायेगु कथं ज्या यायेमफूगुया ल्यूने मन्त्रीपिं मखु, प्रधानमन्त्री व वया सल्लाहकारपिनिगु अनावश्यक हस्तक्षेप हे खः ।

प्रधानमन्त्रीया सचिवालय समूह व सल्लाहकारपिन्सं शाखा अधिकृतया सरुवा बढुवाय् तकं च्यूताः तल । इमिगु खँ मन्यंबलय् बहिर्गमनय् लात । मुलुक संघीयताय् वनेधुंकाः कर्मचारी समायोजनथें जाःगु जटिल ज्या क्वचायेका । थःम्हं यानागु बांलाःगु ज्या नं प्रधानमन्त्रीयात न्यंकेमखंक हे लिचिलेमाल । –लालबाबु पण्डित

छखे नेपाली कृषकयात प्रोत्साहित यायेगु नीति काइगु, मेखे विदेशं पाउडर दुरु हयाः उकी हे लः ल्वाकछ्यानाः मिइगु । थ्व ज्याया अन्त्य यायेत जिं पाउडर दुरुइ प्रतिबन्ध तयागु खः । तर, प्रधानमन्त्रीं व्यापारीतय्गु प्रभावय् लानाः चुं दुरु आयात यायेत धाल । नेपाली कृषकया दुरु लँपुइ हे वाइगु अवस्था वयेके मबिइगु पक्षय् ज्या यानाबलय् लिचिले माल । –चक्रपाणि खनाल

प्रधानमन्त्रीयात नापलाये त्यना, सचिवालयं फोन हे ल्ह्वनीमखु । फोन ल्ह्वंसां नं रेस्पोन्स जुइमखु । छगू कथं प्रधानमन्त्री घेराबन्दीइ हे लात । मन्त्रीं प्रधानमन्त्रीयात नापलाये दइमखु धाःबलय् यक्वसित अजू चायेफु । छाय् लिचिला मस्यू । –थममाया थापा

न्हूगु मदिराया लायसेन्स चायेके बिइमज्यू धैगु अडानय् च्वनागु खः । उकिं विधेयक पेश याये मानेमजुया । उद्योग सचिव यमकुमारी खतिवडां प्रधानमन्त्रीया निर्देशन धासें विधेयक तयार यात । जिं न्हूगु लाइसेन्स बिइमाः धैगु बुँदा खुनाबिया । वहे विधेयक संसदय् पेश जुल । प्रधानमन्त्री जि खनाः तंम्ह्वल । शशीकान्त अग्रवालयात चि आयातया नितिं लाइसेन्स बिइत प्रधानमन्त्रीं यक्व हे दबाब ब्यूगु खः । –मातृका यादव

मलेसियालिसे श्रम सम्झौता जुइधुंकाः कार्यान्वयन यायेत प्रधानमन्त्री ओलीं श्रममन्त्री गोकर्ण विष्टयात यक्व हे सम्झेयाना । तर, दच्छि ई फूसां नं विष्टं कार्यान्वयन याये मानेमजुल । वधुंकाः प्रधानमन्त्रीं ख्वाच्वः बिसें तुरुन्त कार्यान्वयन या धाल । मन्त्री विष्टं बरु जितः लिका । व ज्या जिं यायेमखु धया । –गोकर्ण विष्ट

दूरसंचार प्राधिकरणया विवादास्पद व्यक्ति दिगम्बर झायात नायः नियुक्त यायेमते धैगु पक्षय् गोकर्ण विष्ट, लालबाबु पण्डित, प्रदीप ज्ञवाली व मदुम्ह रवीन्द्र अधिकारी दूगु खः । तर, प्रधानमन्त्रीं याये हे माःगु अडान काल । उगु बैठकय् निर्णय मजुल । प्रधानमन्त्री तंम्ह्वल । मेगु बैठकय् ब्वति कायेत वनाबलय् कानूनमन्त्री भानुभक्त ढकालं दूरसंचार प्राधिकरणया नायः पदय् दिगम्बर झा नियुक्त जुल धकाः मन्त्रिपरिषदया निर्णय न्यंकल । बैठकय् ब्वति कायेत वंपिं मन्त्रीपिं थ्व निर्णय न्यनाः त्वां जुल । –छम्ह मन्त्री

थ्व धापूत मन्त्री पदं बिदा जुइधुंकाः मिडियाय् पिहाँ वःगु खँत खः । थ्व खँतसें नं ओलीया नेतृत्वय् सरकारय् च्वंबलय् मन्त्रीपिन्सं गुलि पीडा, तनाव फःगु दु धैगु सीदु ।

दिगम्बर झाथें जाःम्ह भ्रष्टाचारीयात नेपाल दूरसंचार प्राधिकरणया नायः यायेत प्रधानमन्त्री ओलीं मन्त्रिपरिषदया बैठक हे छलेयायेमाmगु व छक्वलं मन्त्रिपरिषदया बैठकय् ब्वति कायेत वःपिं मन्त्रीपिन्त कानूनमन्त्रीया म्हुतुं उगु निर्णय न्यंकेमाःगु अवस्था गुकथं ब्वल धैगु अनुमान यायेफु । एनसेलया २० प्रतिशत शेयरधनी सतिसलाल आचार्यया आग्रहय् झा निक्वःगुखुसि प्राधिकरणया नायः पदय् नियुक्ति जूगु खः ।

सरकारं दुरु उत्पादनय् नेपाःयात आत्मनिर्भर यायेगु नीति काःगु दु । तर, पाउडर दुरु आयात यानाः नेपाली किसानपिन्त स्यायेगु दलाल पुँजीपतिपाखें प्रधानमन्त्री गुकथं प्रभावित जुल धैगु खँ खनालया धापूपाखें स्पष्ट जू ।

प्रधानमन्त्रीया जःखः चाःहिलीपिं व सचिवालयया हाकिमतसें कर्मचारी सरुवा, बढुवाय् गुलितक मानसिक दबाब बिइगु यानाच्वंगु दु धैगु खँ लालबाबु पण्डितथें जाःम्ह सोझा मन्त्रीया पीडापाखें खंकेफु ।

थ्वला छुं उदाहरण जक खः । मन्त्रीइ पुनर्वहाली जूपिनिगु पीडा नं थ्वसिबें म्हो मजू । गुपिं मन्त्री पदं खुस्के जुल, इपिं छाय् खुस्के जल धैगु खँ थुगु सामान्य घटनां धयाच्वंगु दु । गुपिं मन्त्री पदय् बहाल जुल, इमिसं पद बचेयायेत गुज्वःगु गुज्वःगु हर्कत यात जुइ धैगु अनुमान यायेफु ।

नेकपाया सरकारं २० महिना ई फूसां तकं जनतां अनुभूति यायेगु कथं ज्या यायेमफूगुया ल्यूने मन्त्रीपिं मखु, प्रधानमन्त्री व वया सल्लाहकारपिनिगु अनावश्यक हस्तक्षेप हे खः । वंगु मोहनी न्ह्यः मेलम्चीया लः येँय् हयेगु ठेकेदारपिन्त बिसिके छ्वःम्ह खानेपानीमन्त्री वीना मगरथें असक्षम मन्त्री निष्काशन मयायेगु, गोकर्ण विष्टथें जाःम्ह इमान्दार व्यक्ति निष्काशित जुइमाःगु विडम्बनाया खँ खः ।

निष्काशन हे यायेगु खःसा अर्थमन्त्री युवराज खतिवडाथें जाःम्ह घमण्डी मन्त्रीयात निष्काशन यायेमाःगु खः । खतिवडाया कारण फुक्क क्षेत्रय् कर आतंक ब्वलंगु दु । अर्थतन्त्र डामाडोल जूगु दु ।

विदेशं पाम आयलया कच्च पदार्थ झिकेयानाः उकिया हे उत्पादनयात निर्यात याःबलय् आयात म्हो जुल निर्यात अप्वल धकाः प्रधानमन्त्रीयात झुकेयानातःगु दु ।
चिइकूम्ह राज्यमन्त्री व न्हूम्ह हःम्ह उद्योग राज्यमन्त्री मोतीलाल दुगड सु खः ? धैगु यक्वसिनं मस्यू । कम्युनिष्ट आन्दोलनय् ताःई न्ह्यःनिसें जूम्ह व प्रतिनिधिसभाया निर्वाचनपाखें चुनाव त्याकावःम्ह इमान्दार कार्यकर्ता पुनर्गठनय् मलाइगु, हृदयेश त्रिपाठीथें जाःम्ह अवसरवादी मन्त्री जूगु दुर्भाग्य खः । थुकिं पार्टीया क्वय् च्वंगु तहतक असन्तुष्टि अप्वःगु दु ।
–दृष्टि साप्ताहिकपाखें

Categorized in पत्रपत्रिका