telecom 18 kartik 2076

मचा चिनाखँ वाचन धेंधेंबल्ला कासाया सिरपाः देछाल (भिडियो)

नेवा: अनलाइन न्युज – ललेन्द्र शाक्य | २०७६ आश्विन २७, सोमबार १५:३३:००

ग्लोबल नेपाल नेटवर्क व नेवाः एचडी टिभीया मंकाः ग्वसालय् येँया खुसिबुइँ च्वंगु नेपाः ब्यांक्वेटय् मचा चिनाखँ वाचन धेंधेंबल्ला कासाया सिरपाः देछा ज्याझ्वः न्ह्याःगु दु ।

जनकवि दुर्गालाल श्रेष्ठया मूपाहाँसुइ न्ह्याःगु उगु सिरपाः देछा ज्याझ्वः ग्वसाः खलः ग्लोबल नेपाल नेटवर्कया कजि सुनिलकुमार शाक्यया सभानायःसुइ न्ह्याःगु खः ।

पाहाँ कथं नेवाः न्ह्यलुवाः मल्ल के. सुन्दर, येँ महानगरपालिकाया उपमेयर हरिप्रभा खड्गी श्रेष्ठ, मचा चिनाखँ वाचन धेंधेंबल्ला कासा निर्णायक मण्डलया कजि भूषणप्रसाद श्रेष्ठ, कुमोद श्रेष्ठ, नेवाः वस्ती नेवाः स्कूल अभियानया कजि दीपक तुलाधर, एकीकृत वस्ती अभियानया कजि मचाराजा महर्जन, जगतसुन्दर ब्वनेकुथिया प्रिन्सिपल सुमी मानन्धर, नेवाः एचडी टिभीया प्रमुख नविन जोशी, नेवाः शिक्षा गुथिया वदन सर, हलिं नेवाः दबूया श्रीजन प्रधानपिं झायादीगु खः ।

ज्याझ्वलय् मूपाहाँ जनकवि दुर्गालाल श्रेष्ठपाखें त्वाःदेवाय् मत च्याकाः उलेज्या यानादीगु खःसा जगतसुन्दर ब्वनेकुथिया मचातपाखें नेवाः राष्ट्रिय गान न्ह्यब्वःगु खः । 

ज्याझ्वःया सभापति ग्लोबल नेपाल नेटवर्क व नेवाः एकता अभियानया कजि सुनिलकुमार शाक्यपाखें लसकुस न्वचू न्ह्यब्वःगु उगु ज्याझ्वलय् निर्णायक समितिया कजि भूषणप्रसाद श्रेष्ठपाखें चिनाखँ कासाय् ब्वति काःपिं मचातय्गु नां धलः ब्वनाः न्यंकेगु व न्हाप, ल्यू लिसें लियांल्यू लाःपिं मचातय्गु नां घोषणा यानादीगु खःसा ज्याझ्वः न्ह्याकामि सुनिता डंगोलपाखें मचातय्गु नां ब्वनाः दबुली सःतूगु खः ।

चिनाखँ कासाय् ब्वति काःपिं मचातय्त ग्लोबल नेपाल नेटवर्कया कजिलिसें ज्याझ्वःया सभापति सुनिलकुमार शाक्यं खादा न्ययेकूगु खःसा मूपाहाँ जनकवि दुर्गालाल श्रेष्ठपाखें सिरपाः व दसिपौ लःल्हानादीगु खः ।

(थन क्लीक यानाः भिडियो स्वयादिसँ)

Categorized in नेवाः