मंसीर २८ गते आर्टिष्ट फुटबल म्याच, नां दुतिनेगु २१ गतेतक
नेवा: अनलाइन न्युज – ललेन्द्र शाक्य | २०७६ मङ्सिर २, सोमबार १५:००:३३
नेपालभाषा संकिपा संगीत ख्यलय् दकले तःधंगु अवार्ड कथं पिलु वयाच्वंगु नेपालभाषा स्टार म्यूजिक भिडियो अवार्ड २०१९ या प्रचारप्रसारया ज्याझ्वःया रुपं आर्टिष्ट फुटबल म्याच–२०१९ जुइगु जूगु दु ।
यल महानगरपालिका २१ वडाया विशेष ग्वाहालिइ संसार क्रियसन्सया ग्वसालय् जुइगु नेपालभाषा स्टार म्यूजिक भिडियो अवार्ड–२०१९ सुथां लाकेगु नितिं थुकथं कलाकार–कलाकार दथुइ फुटबल कासाया ग्वसाः ग्वःगु खः ।
थ्वहे वइगु मंसीर २८ गते शनिवाः सुथसिया ११ ता ईनिसें खोनाया ज्ञानोदय बालबाटिका इन्टरनेशनल स्कूलया खेल मैदानय् जुइगु उगु आर्टिष्ट फुटबल म्याचय् सहभागी जुइगु नितिं कलाकार कासामिं नां दर्ता शुल्क कथं प्रति कलाकार कासामि द्वःछि तका दां क्वःछिनातःगु दु । कासाय् सहभागिताया नितिं नां दर्ता यायेगु लिपांगु थ्वहे मंसीर २१ गतेतकया तिथि क्वःछिनातःगु दुसा ग्वसाः खलः संसार क्रियसन्सं फुटबल कासा म्हिते मंदुपिं कलाकारपिन्सं याकनं थःगु नां दर्ता यायेत इनाप याःगु दु ।
उगु नेपालभाषा स्टार म्यूजिक भिडियो अवार्डया नितिं ५७ पू नेपालभाषाया म्यूजिक भिडियो सहभागी जूगु दु । फुटबल कासा क्वचाये धुंकाः याकनं हे टप टेन ल्ययाः ग्राण्ड फिनाले जुइगु जानकारी ग्वसाः खलः संसार क्रियसन्सया प्रमुख स्वतन्त्र संसार महर्जनं नेवाः अनलाईनन्यूजयात जानकारी बियादीगु दु ।
