nepal lifef 2076 8 8

मंसीर १७ गते किपूया नगामय् नविन के. भट्टराई व अतृप्त ब्याण्ड या कन्सर्ट

नेवा: अनलाइन न्युज – ललेन्द्र शाक्य | २०७६ मङ्सिर १५, आइतबार १२:०६:२१

किपूया ‘जः’ व ‘मोरस’ ब्याण्डया प्रस्तुति नं जुइगु, १८ मंसीर सांस्कृतिक ज्याझ्वः

‘मिसा प्रकृतिया बरदान खः, सकस्यां सम्मान यायेनु’ धैगु नारा थ्वयेकाः किपूया ९ वडा नगामय् नांजाःम्ह म्येहालामि नविन के. भट्टराई व अतृप्त ब्याण्डया कन्सर्ट ज्याझ्वः जुइगु जूगु दु ।

नगांया सामाजिक लिसें सुचुपिचु व किपूया सांस्कृतिक धरोहर संरक्षण यायेगु ज्याय् न्ह्यचिलाः वयाच्वंगु सक्रिय संस्था नगां तजिलजिया ग्वसालय् किपूलिसें दक्षिण पश्चिम भेगया नांजाःगु न्हेगां जात्राया झ्वलय् नगांया बालकुमारी जात्रा (धाल्चा खाकेगु) जात्राया लसताय् मंसीर १७ गते मंगलवाः लोकंह्वाःम्ह म्येहालामि नविन के. भट्टराईया कन्सर्ट ज्याझ्वः यायेत्यंगु खः ।

नविन के. भट्टराई व अतृप्त ब्याण्डया उगु कन्सर्ट ज्याझ्वःया विषयस थौं आइतवाः छगू पत्रकार सम्मेलन जूगु दु । किपूया ९ वडा, पांगा वनेगु दुपातय् च्वंगु कःसि क्याफे रेष्टुरेन्टय् जूगु उगु पत्रकार सम्मलेनय् पाहाँ कथं किपू नगरपालिका ९ वडाया वडाध्यक्ष गंगाराम महर्जनलिसें कीर्ति इभेन्टसया नायः राकेश महर्जन पाहाँ कथं झायादीगु खःसा ९ वडा दुजःलिसें कीर्तिपुर प्रहरीया प्रतिनिधिपिनिगु नं उपस्थिति दूगु खः । अथेहे, उगु पत्रकार सम्मेलनय् कन्सर्ट ज्याझ्वःया कजि सरोज तुलाधरया नं उपस्थिति दूगु खः ।

पत्रकार सम्मेलनय् सार्वजनिक याःगु प्रेस विज्ञप्तिइ मंसीर १७ गते मंगलवाः सनिलया ५ ता इलय् नविन के. भट्टराई व अतृप्त ब्याण्डया कन्सर्ट ज्याझ्वः सुरु जुइगु जानकारी बियातःगु दुसा विज्ञप्तिइ नविन के. भट्टराईया लिसेलिसें किपूया नांजाःगु ब्याण्ड ‘जः’ व ‘द मोरस’ ब्याण्डया नं मंकाः सांगितिक कन्सर्ट जुइगु जानकारी बियातःगु दु ।

सार्वजनिक याःगु विज्ञप्तिइ धयातःगु दु, “किपूया कला संस्कृति सम्पदा संगीत जगेर्ना यायेगु आज्जुं पलिस्था जूगु नगां तजिलजिया मू आज्जु धैगु किपू नगरया सांस्कृतिक कला–संस्कृति लिसें सम्पदां जाःगु धरोहरतय्गु संरक्षण व प्रवर्द्धन यायेगु खःसा मूलभुत रुपं किपू नगरयात सांगितिक व सांस्कृतिक नगरया रुपं पलिस्था यायेगु खः ।”

कन्सर्ट ज्याझ्वः कजि सरोज तुलाधरया ल्हाःचिं तयाः पिथंगु उगु प्रेस विज्ञप्तिइ धयातःगु दु, “नगां तलिजजिया ग्वसालय् २०७६ मंसीर १७ गते मंगलवाः सनिलया ५ ता यलय् लोकंह्वाःम्ह कलाकार नविन के. भट्टराई व अतृप्त ब्याण्डया लिसें किपूया नांजाःगु ब्याण्ड जः व मोरसया सांगितिक कन्सर्टय् सकलसित सहभागिताया नितिं इनाप यानाच्वना नापं मंसीर १८ गते बुधवाः नं वहे इलय् सांगितिक ज्याझ्वः जुइगु जानकारी बियाच्वना ।”

थुगु नगां तजिलजिं वंगु नेपांःया मौलिक संवत नेपाल संवत् न्हूदँ ११४० व स्वन्ति नखःया लसताय् नगांया लाछि त्वालय् हे कन्सर्ट ज्याझ्वः याःगु खः ।

Categorized in कला