नेवा: अनलाइन न्युज | २०७६ भाद्र १०, मंगलबार १३:१९:००

नेपाली कांग्रेसया भ्रातृ संस्था नेपाल महिला संघया संस्थापक नायः मदुम्ह मंगलादेवी सिंहया २३ क्वःगु स्मृति दिवस तःजिक न्यायेकूगु दु ।

नेपाल महिला संघ येँ जिल्लाया ग्वसालय् मंगलवाः सुथय् मदुम्ह सिंहया झ्वाता पलिस्था यानातःगु थाय् येँया शोभाभगवतीइ छगू ज्याझ्वःया ग्वसाः ग्वयाः स्वांम्हाः क्वखायेकूगु खः ।

ज्याझ्वलय् कांग्रेस नेतालिसें मदुम्ह मंगलादेवी सिंहया काय् प्रकाशमान सिंहं नेपाली मिसापिनिगु हक अधिकारया नितिं सः थ्वयेकूम्ह मिसा मंगलादेवी सिंह जूगु धाःगु दु ।

नेता प्रकाशमान सिंहं धाःगु दु, “नेपालय् एकतन्त्री राणाशासन वांछ्वयेगु खँय् जुइमा वा प्रजातान्त्रिक व लोकतान्त्रिक आन्दोलय् जुइमाः मंगलादेवी सिंहया महत्वं जाःगु योगदान दु । बि. स. २०७२ सालय् जारी जूगु संविधानं मिसापिन्त गुगु कथ.या अधिकार ब्यूगु दु, व मिसाया आन्दोलनया हुनिं जूगु खः ।”

कांग्रेस येँया सभापति सबुज (कृष्ण) बानियां मिसाया हकअधिकारया नितिं जक मजूसे सर्वोच्च नेता गणेशमान सिंहयात सर्वोच्च नेता दयेकेत मंगलादेवी सिंहया तःधंगु योगदान दूगु खँ धाःगु दु ।

ज्याझ्वलय् कांग्रेस केन्द्रीय दुजः नवीन्द्रराज जोशी, येँ महानगरपालिकाया उपप्रमुख हरिप्रभा खड्गी श्रेष्ठ, प्रदेशसभा दुजः जीवन डंगोल, नेपाल महिला संघ येँया नायः विष्णुदेवी पुडासैनी लिसेंया व्यक्तित्वपिनिगु सहभागिता दूगु खः ।

मिसाया अधिकारयात सुरक्षित यायेत बि.स. २००४ साल साउन २४ गते मदुम्ह मंगलादेवी सिंहया नायःसुइ मिसा भेला यानाः महिला संघया पलिस्था याःगु खः ।

Categorized in राष्ट्रिय