ad 2076 5 18

मंकाः खलःपाखें नं गुथि विधेयकया विरोध

नेवा: अनलाइन न्युज | २०७६ जेठ २९, बुधबार १०:०६:३७

नेवाःतय्गु पुलांगु संस्था नेपालभाषा मंकाः खलःपाखें नं गुथि ऐन विधेयकयात कयाः विरोध याःगु दु ।
खलःया नायः जनकवि दुर्गालाल श्रेष्ठं ल्हाःचिं तया पिथंगु विज्ञप्तिइ नेवाः जातिपिन्त थःगु हे आदिभूमिपाखें विस्थापित यायेगु व थुमिगु कला संस्कृति व सम्पदा ल्यनाच्वंगु म्हसीकायात हांनिसें वांछ्वयेगु कथं सरकारं हःगु गुथि सम्बन्धी विधेयकयात खलःपाखें घोर विरोध यानागु खँ न्ह्यथनातःगु दु ।
अथेहे, थुगु विधेयकया विरुद्ध स्वनिगःया स्थानीय जनतां माइती मण्डलाय् याःगु विरोध प्रर्दशनय् प्रहरीं हस्तक्षेप याःगुलिं उगु दमनयात नं भत्सर्ना याःगु दु ।
सार्वजनिक याःगु वक्तव्यय् नेवाः जातिविरुद्ध ल्ह्वनाहःगु थुगु षडयन्त्रविरुद्ध ल्वायेत एकीकृत शक्ति आवश्यकता जूगु धासें नेवाः जातिलिसे थीथी कथंया आन्दोलन व अभियानया सक्रिय जुयाच्वंगु समिति, फुक्क जातिया गुथि, जातीय खलः पुचः, भाषिक संघसंस्था छथाय् च्वनाः न्ह्यायेमाःगु आवश्यकता जूगु खँ नं न्ह्यथनातःगु दु ।

Categorized in नेवाः