ad 2076 5 18

भोटेकोसीइ खुसिबाः, रसुवाया बेलिब्रिज चुइकल

नेवा: अनलाइन न्युज | २०७६ भाद्र २, सोमबार १२:१९:२२

भोटेकोसी खुसिय वःगु खुसिबालं रसुवाया बेलिब्रिज चुइकाः यंकूगु दु ।

तच्वक. वा वयेधुंकाः आइतवाः आकाझाकां वःगु खुसिबाल. टिमुरे भन्सार ज्याकुथि, सुख्खा बन्दरगाहपाखें रसुवागढी जलविद्युत आयोजनापाखे वनेगु बेलिब्रिज चुइकाः यंकूगु खः ।

रसुवाया प्रमुख जिल्ला अधिकारी अर्जुन भण्डारीं आकाझाकां वःगु खुसिबाल. सतक कटान यायेधुंकाः बेलिब्रिज चुइकाः यंकूगु जानकारी ब्युगु दु ।

उगु तां (पुल) खुसिबालं चुइकाः यंकेधुंकाः रसुवागढी सुख्खा बन्दरगाहपाखें रसुवागढी जलविद्युत आयोजनापाखें वयेवने याइगु सहायक मार्ग सम्पर्क विच्छेद जूगु खः । प्रजिअ भण्डारीया कथं आः टिमुरेसिबें क्वय् च्वंगु तातोपानी तां छ्यलाबुला यायेमालीगु बाध्यता वःगु दु ।

खुसिबालं रसुवा भन्सार व जलविद्युत आयोजनाया सामान कुबित छ्यलाबुला जुया: वयाच्वंगु थ्यंमथ्यं ३ दर्जन गाडी जोखिमय् लाःगु खः । तर, बहनी हे खुसि सिथया गाडी सुरक्षित थासय् यंकुगुलिं थप क्षति मजूगु प्रशासनं जानकारी ब्यूगु दु ।

रसुवाया प्रमुख जिल्ला अधिकारी अर्जुन भण्डारीं धाःगु दु, “तिब्बतं न्ह्यानावइगु भोटेकोसीया सतह आकाझाकां ५ मिटरतक थाहाँ वःगु खः । वधुंकाः भन्सारय् च्वंगु ट्यांकरयात बहनी हे सुरक्षित थासय् यंकागु खः ।”

तच्वकं वा वयेधुंकाः भोटेकोसीइ वंगु चान्हय् खुसिबाःया बहाव आकाझाकां अप्वःगु ख: । सम्भावित दुर्घटनायात ध्यानय् तयाः प्रशासनं पावर हाउसया पावर तकं कटअफ याःगु खः ।

खुसिइ बहाव अप्वयेधुंकाः स्वाफ्रुबेसी, गुमचेत, मेलुङ, पहिरोबेसी, शान्तिबजाःनिसें खाल्डेतकया वस्ती जोखिमय् लाःगु खःसा अनया बासिन्दापिन्त बहनी हे सुरक्षित थासय् यंकुगु खः ।

खुसिबाःया बहाब बहनी अप्वः जूगु जूसां नं आः अवस्था सामान्य जूगु प्रजिअ भण्डारीं जानकारी ब्यूगु दु ।

बहनी खुसिइ आकाझाकां अप्वःगु बहावं छुं बस्तीत जोखिमय् लाइगु खतरा अप्वःगु खः । तर, खुसिया बहाब म्हो जुइधुंकूगुलि. आः उज्वःगु छुं खतरा मदु धकाः प्रजिअ भण्डारीं अनया लिपांगु अवस्थाबारे जानकारी ब्यूगु दु ।

Categorized in दुर्घटना-अपराध