ad 2076 5 18

भारतया पूर्व अर्थमन्त्री भ्रष्टाचार द्वपनय् गिरफ्तार

नेवा: अनलाइन न्युज | २०७६ भाद्र ५, बिहिबार १२:५८:५१

भारतया पूर्व अर्थमन्त्री पी. चितम्बरम भ्रष्टाचार द्वपनय् गिरफ्तार जुगु दु । केन्द्रीय अनुसन्धान ब्युरो (सीबआिई) या पुचलं चितम्बरमयात वया हे छेँपाखें गिरफ्तार याःगु खः ।

चितम्बरमयात बिहिवाः अदालतय् उपस्थित याकुगु खः । वयात १४ दिं हिरासतय् तयाः अनुसन्धान यायेत अनुमति काःगु खः ।

आईएनएक्स मिडियालिसे सम्बन्धित भ्रष्टाचारया अभियुक्त चितम्बरम. अग्रीम जमानतया याचिका दिल्ली हाई कोर्ट न्ह्यःने याःगु खः, तर व खारेज जुइधुंकाः सीबीआई नं गिरफ्तार याःगु खः ।

मिडिया कम्पनी आईएनएक्सयात फाइदा जुइगु कथं विदेशी लगानी स्वीकृत याइगु विभाग फरेन इन्भेष्टमेन्ट प्रमोशन बोर्ड (एफआईपीबी)पाखें अनियमितता याःगु द्वपं चितम्बरमयात लाःगु दु । उगु मिडिया कम्पनीयात विदेशी लगानीया स्वीकृति ब्यूबलय् चितम्बरम अर्थमन्त्री जुयाच्वंगु खः ।

मंगलवाःनिसें चितम्बरम सम्पर्कय् मवःगु खः । तर बुधवाः सनिलय् स्थानीय ई कथं ८ः१५ ता इलय् कांग्रेस ज्याकुथिइ थ्यंकाः वं पत्रकार सम्मेलन याःगु खः । पत्रकार सम्मेलनय् वं थःत ब्यूगु भ्रष्टाचारया द्वपं सही मजूगु दाब ियाःगु खः । वं थः बिस्युं मवनागु बरु थःगु हे हितया रक्षाया नितिं कानूनया शरणय् वनागु नं धाःगु खः ।

वं धाःगु दु, ‘जि जिगु वकिललिसे च्वनाः थःगु भ्वँ तयार यानाच्वनागु खः । तर जितः सुलाच्वन धकाः द्वपं बिल । सत्य ला छु खः धाःसा कानूनयाके सुरक्षा फ्वनाच्वनागु खः ।’

अय्सां वया पत्रकार सम्मेलनय् सीबीआईया पुचः थ्यंसां नं अनं गिरफ्तार मयाः । पत्रकार सम्मेलन लिपा व जोरबागय् च्वंगु थःगु छेँय् लिहाँ वंगु खः । व छेँय् थ्यंगु छुं मिनेट दुने हे सीबीआईया पुचः न. अन थ्यन । तर, चितम्बरमया छेँया लुखा मचाः । टेलिभिजन च्यानलपाखें प्रसारण याःगु भिडियोय् लुखा तछ्याना: सीबीआईया पुचः छेँ दुने दुहाँ वंगु खनेदु । वधुंका: सुरक्षाया नितिं दिल्ली प्रहरीयात नं सःतूगु खः । छुं ई दुने चितम्बरमया कार्यकर्तापिं छेँ पिने मुनाः सरकार व प्रहरीविरुद्ध नाराबाजी याःगु खः ।

थ्वसिबें न्ह्यः सीबीआईया पुचः मंगलवाः हे वया छेँय् थ्यंकुगु खः, तर व नापमलाये धुंकाः पूर्जी त्वःताः वंगु खः । सीबीआई न. धाःगु खः, ‘जिपिं चितम्बरमयात गिरफ्तार यायेत मालाच्वनागु दु, तर व लुयामवःनी ।’

अथेला चितम्बरमं काग्रेस ज्याकुथिइ पत्रकार सम्मेलन याःबलय् सीबीआईया पुचः नं अन हे दु, तर गिरफ्तार मयात । चितम्बरम छेँ वनेधुंकाः जक सीबआिई नं नियन्त्रणय् काल व थःगु मुख्यालयस यंकल । थुगु ज्यायात ‘सीबीआईया भयंकर नाटक’ धकाः मिडियातसें टिप्पणी याःगु दु ।

Categorized in अन्तर्राष्ट्रिय