chetrapa55

भाद्र ६ गते किपुली उस्ताद गोविन्द किपू फाउण्डेशनया सांगितिक ज्याझ्वः जुइगु

नेवा: अनलाइन न्युज – ललेन्द्र शाक्य | २०७६ श्रावण २२, बुधबार १५:३३:५६

दँय् दसंथें थुगुसी नं किपुली न्याक्वःगु संस्करण कथं उस्ताद गोविन्द किपू फाउण्डेशनया ग्वसालय् तःजिक थीथी सांस्कृतिक ज्याझ्वःया लिसें ज्येष्ठ नागरिक सम्मान ज्याझ्वः जुइगु जूगु दु ।

किपूया ३ वडाय् च्वंगु कुतिसा त्वालय् थ्वहे वइगु भाद्र ६ गते शुक्रवाः कृष्ण जन्माष्टमीया दिं उगु ज्याझ्वः जुइगु जानकारी ग्वसाः खलः  उस्ताद गोविन्द किपू फाउण्डेशनया नायः दिलीप किपू नं नेवाः अनलाईनन्यूजयात जानकारी बियादीगु दु ।

नांजाःम्ह उस्ताद मदुम्ह गोविन्द किपूया लुमन्तिइ किपुली संगीत ख्यःया उत्थान यायेगु आज्जु तयाः उस्ताद गोविन्द किपू फाउण्डेशन नीस्वंगु खः । मदुम्ह उस्ताद किपू उगु हे किपू ३ वडा कुतिसा त्वाःया बासिन्दा खःसा वय्कःया काय् नांजाःम्ह तबला बादक दिलीप किपूया सक्रियताय् थीथी व्यक्तिपिं जानाः उगु फाउण्डेशन नीस्वंगु खः ।

वइगु भाद्र ६ गते शुक्रवाः कृष्ण जन्माष्टमीया दिं जुइगु उगु ज्याझ्वलय् उगु त्वाःया ज्येष्ठ नागरिकपिन्त सम्मान यायेगु लिसें उस्ताद गोविन्द किपूया उगु ईया शिष्यलिसें लिक्क लाःपिं संगीतकःमिपिन्त नं सम्मान यायेगु जानकारी फाउण्डेशनया नायः दिलीप किपू नं बियादीगु दु ।

फाउण्डेशनया नायः भाजु किपू नं धयादी, “जि अबु गोविन्द किपूया न्हापांगु ब्याचया विद्यार्थीपिं थौंकन्हय् लोकंह्वाःम्ह संगीतकःमि हरिशरण सायमि, नांजाःम्ह तबला बादक न्हुच्छे दर्शन, नांजाःम्ह गायक राजु महर्जन जः, नांजाःम्ह संगीतकःमि ज्ञानेश्वर निभाः लिसें नांजाःम्ह म्येहालामि राजेश महर्जन नेवाःयात फाउण्डेशनपाखें सम्मान यायेगु ग्वसाः ग्वयागु दु ।”

भाजु दिलीप किपू नं उगु ज्याझ्वलय् किपूया थीथी कलाकारपिनिगु सांगितिक प्रस्तुतिलिसें नेपाःया नांजाःपिं संगीतकःमिपिनिगु सांगितिक ज्याझ्वःया लिसें फ्युजन म्यूजिक, हुलाप्याखंया न्ह्याइपुगु समिश्रण दुथ्याका ज्याझ्वः यायेगु ग्वसाः ग्वयागु खँ नं कनादीगु दु ।

उगु उस्ताद गोविन्द किपू फाउण्डेशनं किपुली दँय् दसं थुज्वःगु कथं ज्याझ्वः न्ह्याकाः वयाच्वंगु दु ।

Categorized in कला