telecom 18 kartik 2076

भाद्र २८ गते नेपाल ओलम्पिक कमिटीया चुनाव

नेवा: अनलाइन न्युज | २०७६ भाद्र २६, बिहिबार ११:४८:२६

नेपाल ओलम्पिक कमिटीया न्हूगु नेतृत्वया नितिं जीवनराम श्रेष्ठ व उमेशलाल श्रेष्ठ मैदानय्

नेपाल ओलम्पिक कमिटीया न्हूगु नेतृत्व ल्ययेत वइगु भाद्र २८ गते शनिवाः निर्वाचन जुइगु जूगु दु ।

सर्वोच्च अदालतं निर्वाचनया लँपु चायेका: बिइधुंकाः भाद्र २८ गते शनिवाः सुथय् ८ ता ईनिसें सातदोबाटोय् च्वंगु ज्याकुथिइ निर्वाचन यायेत्यंगु खः ।

नेपाल ओलम्पिक कमिटीया नायः जीवनराम श्रेष्ठं अन्तर्राष्ट्रिय ओलम्पिक कमिटी व ओलम्पिक काउन्सिल अफ एसियाया पर्यवेक्षणय् निर्वाचन जुइगु जानकारी ब्यूगु दु ।

थ्वसिबें न्ह्यः नेपाल ओलम्पिक कमिटीया ज्यासना पुचःया निर्वाचनया मतदान ज्याझ्वः भाद्र २० क्वःछ्यूगु खः । तर, निर्वाचन स्थगित यायेत माग यासें ज्यासना पुचःया दुजः कमलबहादुर चित्रकारं दायर याःगु रिटय् सर्वोच्चं भाद्र १७ गते अन्तरिम आदेश बिसें निर्वाचन मयायेत धाःगु खः ।

वंगु आइतवाः निगुलिं पक्षलिसे सहलह यायेधुंकाः तेजबहादुर केसी व मनोजकुमार शर्माया इजलासं निर्वाचन पनेम्वाःगु फैसला न्यंकूगु खः ।

नेपाल ओलम्पिक कमिटीया न्हूगु नेतृत्वया नितिं जीवनराम श्रेष्ठ व उमेशलाल श्रेष्ठ मैदानय् दु ।

महासचिव पदय् धाःसा उमेशलाल पक्षपाखें पुरेन्द्रविक्रम लाखे व जीवनराम प्यानलपाखें निलेन्द्रराज श्रेष्ठ उम्मेदवार जूगु दु ।

Categorized in कासा