ad 2076 5 18

भाद्र २० व २१ गते मच्छेगामय् लाखे जात्रा

नेवा: अनलाइन न्युज – ललेन्द्र शाक्य | २०७६ भाद्र ८, आइतबार १२:५३:५२

दर्ता यायेगु लिपांगु तिथि भाद्र १७ गतेतक

चन्द्रागिरी नगरपालिका ९ वडा मच्छेगामय् च्वंगु नेपाल साँस्कृतिक कला मन्दिरया ग्वसालय् दँय् दसंथें थुगुसी नं तःजिक लाखे जात्राया ग्वसाः ग्वःगु दु ।

थ्वहे वइगु भाद्र २० व २१ गते निन्हुयंकं जुइगु उगु ज्याझ्वः चन्द्रागिरी नपा ९ वडा मच्छेगांया भलिबल ग्राउण्डय् निन्हुयंकं सुथसिया १० ता ईनिसें जुइगु जानकारी ग्वसाः खलः नेपाल साँस्कृतिक कला मन्दिरया नायः रमेश शाहीं नेवाः अनलाइनन्यूजयात बियादीगु दु ।

प्यक्वःगु राष्ट्रिय लाखे प्याखं ब्वज्यालिसें सांस्कृतिक व सम्मान ज्याझ्वः नं जुइगु उगु ज्याझ्वलय् सहभागिताया नितिं सकल संस्कृतिह्यःमिपिन्त ग्वसाः खलः नेपाल साँस्कृतिक कला मन्दिरं इनाप याःगु दु ।

‘सहभागी जुइनु, थःगु थायया मौलिकता, कला व संस्कृति कालबिल यायेनु’ धैगु नारा थ्वयेकाः जुइगु उगु लाखे जात्राय् सहभागी जुइगु नितिं दर्ता यायेगु दकले लिपांगु तिथि भाद्र १७ गतेतकया ई दूगु जानकारी ग्वसाः खलकं धाःगु दु ।

ग्वसाः खलः मन्दिरया नायः भाजु रमेश शाहीं नेवाः अनलाइनन्यूजलिसे खँ ल्हासें थ्वयां न्ह्यःया स्वक्वःगु ज्याझ्वलय् २९ जिल्लाया ४९ गू पुचलं ब्वति काःगु जानकारी बियादीगु दु । आः थुगुसीया प्यक्वःगु ज्याझ्वलय् थ्वसिबें अप्वः जिल्लां व पुचलं ब्वति काइगु खँ नं भाजु शाहीं कनादीगु दु ।

नायः भाजु शाहीं धयादी, “लाखे ब्वज्याया लिसेलिसें थीथी राष्ट्रियस्तरया व्यक्तित्वपिन्त हनेगु ज्याझ्वःनिसें राष्ट्रियस्तरया नांजाःपिं कलाकारपिनिगु सांगितिक व सांस्कृतिक ब्वज्या जुइ । लिसें विशेष रुपं नेवाः कल्चरयात न्ह्यब्वयेगु तातुनाः स्थानीय कलाकारपिनिगु विशेष ब्वज्या यायेगु जुइ ।”

भाजु शाहीं स्वनिगलं पिनेया जिल्लां ब्वति कायेत वइगु पुचःया नितिं ग्वसाः खलकं च्वनेगु व नयेत्यने यायेगु ब्यवस्था यानातःगु दुसा स्वनिगः दुनेया पुचःयात नेवाः नसाज्वलं नकेगु ब्यवस्था नं दु धकाः जानकारी बियादीगु दु ।

Categorized in नेवाः