nepal investment baink

ब्राजिलया जेलय् कैदी–कैदी ल्वापु, ५२ म्ह सित

नेवा: अनलाइन न्युज | २०७६ श्रावण १४, मंगलबार १०:५३:२५

ब्राजिलया पारा राज्यया छगू जेलय् कैदीबन्दी दथुइ ल्वापु जुयाः कम्ती नं ५२ म्ह कैदीत सीगु दुसा १६ म्ह कैदीपिनिगु छ्यं हे पालाब्यूगु खः ।

अधिकारीपिनिगु कथं अल्टामिरा जेलय् थ्यंमथ्यं न्याघौतक ल्वापु जूगु खः । अधिकारीपिनिगु कथं स्थानीय ईकथं सुथय् ७ ता ईनिसें न्ह्याःगु ल्वापु न्हिनय् जक नियन्त्रणय् वःगु खः ।

स्थानीय मिडियापिनिगु जानकारी कथं जेलया छखेपाखे च्वंपिं कैदीत मेगु पाखे च्वनाच्वंपिं कैदीपिनिगु पुचलय् थ्यनेधुंकाः जूगु विवादं ल्वापुया रुप काःगु खः ।

कैदीबन्दीपिन्सं जेलया निम्ह निम्ह अधिकारीपिन्त बन्धक नं दयेकूगु खः । अय्सां इमित कैदीया नियन्त्रणपाखें मुक्त यायेधुंकूगु दु ।

ल्वापुया झ्वलय् जेल दुने मिँ तःगु खःसा कुँया हुनिं सासलय् समस्या वयाः नं सुं सुं कैदीत सीगु धाःगु दु  ब्राजिलया टेलिभिजनतसें जेलया भवनं कुँ पिहाँ वयाच्वंगु व सुं कैदीपिं जेलया पलिइ वनाच्वंगु लू प्रसारण याःगु खः ।

ब्राजिलया संचारमाध्यमया कथं अल्टामिरा जेलया क्षमता निसःम्ह जूसां नं स्वसः व झिंछम्ह कैदीपिन्त तयातःगु खः ।

ब्राजिलय् जेल दुने हिंसा जुइगुयात सामान्य कथं कायेगु याः । वंगु मे महिनाय् छन्हुं हे प्यंगू ब्यागलं ब्यागलं जेलय् हिंसा जुयाः ४० म्हं मल्याक्क मनूत सीगु खः ।

Categorized in अन्तर्राष्ट्रिय