ad 2076 5 18

बौद्ध दर्शनः दुःख मुक्तिया लँपु

दँय् दसं बैशाख शुक्ल पुन्ही, स्वाँयापुन्हीया दिं न्यायेकाः वयाच्वंगु बुद्धजयन्ती थौं शनिवाः देय् न्यंकं थीथी ज्याझ्वःया ग्वसाः ग्वयाः न्यायेकाः च्वंगु दु ।

एसियाया नगु गौतम बुद्धया जन्म, बुद्धत्व प्राप्ति व महापरिनिर्वाण प्राप्ति बैशाख शुक्ल पुन्हीया हे दिं जूगुलिं थौंया दिंयात बौद्ध धर्मावलम्बीं त्रिसंयोग दिवसया नामं महत्वं जाःगु दिंया रुपं कायेगु यानाः वयाच्वंगु दु ।

नेपाःया लुम्बिनीइ इसापूर्व ५६३ अर्थात् थौंसिबें थ्यंमथ्यं २५६३ दँ न्ह्यः सिद्धार्थ गौतम जुजु शुद्धोधन व लानि मायादेवीया सुपुत्रया रुपं जन्म जुयाः बिज्यानाः २९ दँया उमेरय् दरबार त्याग यानाः ज्ञानया लँपू मालेत पलाः न्ह्याकादिल । खुदँया कठोर तपस्या लिपा ३५ दँया उमेरय् इसापूर्व ५२८ स बौद्धगयाय् बुद्धत्व प्राप्ति यानाः बिज्याःगु खः । वधुंकाः बुद्धया रुपं वसपोलं विश्व प्रसिद्धि कयाः बिज्यात । ३६ दँया उमेरय् सारनाथय् वसपोलं न्हापांगुखुसि न्याम्ह पासापिं शिष्यपिन्त प्रवचन बियाः बिज्याःगु खः गुकीयात ‘‘धर्मचक्र प्रवर्तन’ धायेगु याइ ।

बौद्धनाथ क्षेत्र विकास समितिया पूर्व नायः सम्पूर्णकुमार लामां धयादी, “सारनाथय् प्यंगू आर्य सत्यया विषयस बुद्धं न्हापांगु प्रवचन बियाः बिज्यात, गुकी संसार दुःखै दुःखं व्याप्त जू, दुःखया कारण दु, दुःखया अन्त्य जुइफु व दुःखया अन्त्यया उपाय वा मार्ग नं दु धैगु विषयस प्रवचन बियाः बिज्याःगु खः ।”

बौद्धदर्शनया प्रा. शान्तरत्न बज्राचार्य महामानव बुद्धं बुद्धत्व–ज्ञान प्राप्त यानाः बिज्याःगु मू खँ प्यंगू आर्य सत्य जूगु धयादी । वय्कलं धयादी, “भव तृष्णा, विभव तृष्णा व काम तृष्णाया कारणं दुःखया उत्पत्ति जुइ, उकिया निरोधया नितिं निर्वाण प्राप्त यायेमाः । दुःखयात नाश यायेत तृष्णा क्षय याइगु च्यागू मार्ग–आर्य अष्टाङ्गिक मार्ग– दु धकाः बुद्धं ज्ञान बियाः बिज्याःगु खः ।”

राष्ट्रिय विभूति महामानव गौतम बुद्धं धयाः बिज्याःगु आर्य अष्टाङ्गिक मार्गय् सम्यक दृष्टि, सम्यक संकल्प, सम्यक वचन, सम्यक कर्म, सम्यक जीविका, सम्यक व्यायाम, सम्यक स्मृति व सम्यक समाधि–प्रज्ञा, शील व समाधि– लाः ।

अथेहे, पंचशीलय् खुँज्या मयायेगु, मखूगु खँ मल्हायेगु, यौन व्यभिचार मयायेगु, मद्यपान मयायेगु व हिंसा मयायेगु दु ।

हिन्दू दर्शनं बुद्धयात विष्णु भगवानया नवौं अवतार कथं कयातःगु दु । उकिं बैशाख शुक्ल पुन्ही थौं स्वांयापुन्हीया दिं हिन्दू व बौद्ध निगुलिं धर्मावलम्बीपिन्सं बुद्धयात पूजा यानाः बुद्धजयन्ती न्यायेकाः वयाच्वंगु दु ।

२५६३ क्वःगु बुद्धजयन्ती थौंया दिं स्वनिगःलिसें नेपाः न्यंकं व विदेशय् तकं थीथी ज्याझ्वः यासें न्यायेकाच्वंगु दु । देय् व अन्तर्राष्ट्रिय रुपं न्यायेकीगु बुद्धजयन्ती जूगुलिं थौंया दिं सरकारं सार्वजनिक विदा बिइगु यानाः वयाच्वंगु दु ।