swastha 76 12 19

बाजुराय् अज्ञात ल्वचं निम्ह मचा सित, आपालं संक्रमित

नेवा: अनलाइन न्युज | २०७६ चैत्र ७, शुक्रबार १०:३९:५२

बाजुराया स्वामीकार्तिक खापर गाउँपालिकाय् अज्ञात ल्वचं निम्ह मचात अकालय् सीगु दु । वडा ल्याः २ पुडेनीया चतुरे थापाया प्यला दुम्ह काय् खम्बीर सिंह थापा व वडा ल्याः १ मुक्तिकोटया भर्बले विकया न्याला दुम्ह म्ह्याय् डम्मकला विकया ज्यान वंगु जानकारी ब्यूगु दु ।

अनया स्थानीय बासिनदां खम्बीर सिंह थापा चैत्र ५ गते व डम्मरकला विक चैत्र ३ गते सीगु खः । आः उगु गाउँपालिकाया वडा ल्याः १ व २ या मचात व ज्येष्ठ नागरिकपिं विरामी जुयाच्वंगु धाःगु दु । ज्वरो वइगु, मुसु वइगु व ल्हाःतुति स्याइगु लक्षण खनेदूगु गाउँपालिकाया उपाध्यक्ष मनिा बुढां जानकारी ब्यूगु दु ।

स्वास्थ्य ज्याकुथि बाजुराया बरिष्ठ जनस्वास्थ्य अधिकृत दयाकृष्ण पन्तं प्रभावित गामय् स्वास्थ्यकःमि परिचालन जूगु जानकारी ब्यूगु दु । अथेहे चुवाना, छुदरी, सुपेना, फयालगाउँ, वाउनवाडा, माझगाउँ, पुडेनी, लौडी लिसेंया गांया बासिन्दा विरामी जुइगु क्रम अप्वयाच्वंगु दु ।

वंगु माघ महिनाय् उगु गामय् भाइरल ज्वरोया संक्रमण खनेदूगु खः । गामय् विरामयिा ल्याः अप्वः दूगु जानकारी वःगु व गाउँपालिकालिसेया सहकार्यस टोली वनेधुंकूगु प्रमुख पन्त धाःगु दु । अहेब विर्ज विकलिसेंया टोली प्रभावित गामय् थ्यनेधुंकूगु पन्तं धाःगु दु ।

गाउँपालिका नायः चिरञ्जीवी शाहीं निम्ह मचात सीगु  व सुं सुं विरामी जूगु जानकारी वयेधुंकाः स्वास्थ्यकःमि परिचालन यानाः वासः यायेगु ज्या न्ह्याकागु धाःगु दु । गाउँपालिका केन्द्रपाखें प्रभावित क्षेत्र अढाइ घण्टा न्यासिवनेमाः । प्रहरी नायव उपरीक्षक टंकप्रसाद भट्टराई नं संक्रमण ब्वलंगु खबर वःगु धाःगु दु । प्रमुख जिल्ला अधिकारी गंगाप्रसाद न्यौपानें स्वास्थ्यकःमि प्रभावित धाःगु गांपाखे छ्वयेधुनागु जानकारी ब्यूगु दु ।

थ्वहे झ्वलय् कोभिड १९ या जाँचया नितिं प्यंगू थासय् स्वास्थ्य सहायता कक्ष (हेल्थ डेक्स) तइगु जूगु दु । प्रशासन ज्याकुथिइ च्वंगु सर्वपक्षीय बैठकं जिल्ला दुने दुहाँ वयेगु नाकाय् हेल्थ डेक्स  संचालन यायेगु निर्णय याःगु प्रमुख जिल्ला अधिकारी न्यौपानेंं जानकारी ब्यूगु दु ।

जिल्ला विपद् व्यवस्थापन समितिया बिहिवाः च्वंगु बैठकं कोल्टी विमानस्थल कोल्टी, जगन्नाथ गाउँपालिकाया जुड्डी, बाह्विसया इकडी व मार्तडी दुहाँ वयेगु नाकाय् हेल्थ डेक्स संचालन यायेत्यनागु सहायक प्रमुख जिल्ला अधिकारी व सुचं अधिकारी समीर भण्डारीं जानकारी ब्यूगु दु ।

Categorized in दुर्घटना-अपराध