chetrapa55

बागमती प्रदेश नां तयाः नेवाःतय्गु अस्तित्व हे सिधयेकेत्यंगु दुः नेवाः न्ह्यलुवाः श्रेष्ठ

नेवा: अनलाइन न्युज – ललेन्द्र शाक्य | २०७६ पौष २९, मंगलबार १५:१५:१०

नेपाल कम्युनिष्ट पार्टी नेपाल कम्युनिष्ट पार्टी (नेकपा) पहिचान विरोधी पार्टी जूगु व थ्व पार्टीं नेवाःतय्गु अस्तित्व हे सिधयेकेत स्वःगु द्वपं बिसें सकल नेवाः समुदाययात सचेत जुइत इनाप याःगु दु ।

समाजवादी नेवाः राष्ट्रिय समितिया ग्वसालय् येँया रत्नपार्कं न्ह्याःगु जुलुस येँया थीथी लागा चाःहिलाः थायमदुइ जूगु कोणसभायात सम्बोधन यासें नेवाः न्ह्यलुवाः डा. महेशमान श्रेष्ठं थथे इनाप यानादीगु खः ।

नेवाः न्ह्यलुवाः श्रेष्ठं ३ नम्बर प्रदेशया नां न्ह्याग्गु तःसां छुं मपाः धाइपिन्त लिसः बिसें थःगु छेँया जग्गाया लालपूर्जाय् थःगु हे नां जुइमाः, मेपिनिगु नां जुइमखु । ३ नम्बर प्रदेश नं अथेहे नेवाः व तामाङ समुदायया आदिभूमि जूगुलिं प्रदेश ३ या नां नेवाः ताम्सालिङ जुइमाःगु विचाः प्वंकादीगु खः ।

भाजु श्रेष्ठं नेवाःतय्गु आःया स्थिति धैगु आइसीयुलय् विरामी लानाच्वंगुथें खः । उकिं गुगु नं इलय् मदयेफु । उकिं कांग्रेस, एमाले, माओवादीया कार्यकर्ता धकाः नेवाःत सुम्क च्वनेमज्यूगु विचाः नं प्वंकादीगु खः ।

येँया रत्नपार्कय् च्वंगु शंखधर पार्क शान्तिवाटिकां बागमती प्रदेश विरुद्धय् न्ह्याःगु उगु जुलुस भोताहिति, असं, केलत्वाः, वंघः जुयाः ख्युँलँ भेडासिं थ्यंकाः कोणसभाय् परिणत जूगु खः ।

Categorized in नेवाः