telecom 18 kartik 2076

बलात्कारया द्वपनय् लाःम्ह महराया डीएनए परीक्षण जुइगु

नेवा: अनलाइन न्युज | २०७६ आश्विन २८, मंगलबार १२:३९:१८

थःगु ज्याकुथिया मिसा कर्मचारीयात जबरजस्ती करणीया कुतः याःगु अभियोग लाःम्ह निवर्तमान सभामुख कृष्णबहादुर महराया डीएनए परीक्षण जुइगु जूगु दु ।

मोहनीया इलय् गिरफ्तार यानाः महानगरीय प्रहरी वृत्त सिंहदरबारया हिरासतय् तयातःम्ह महरा आः नर्भिक अस्पतालया क्याबिनय् च्वनाच्वंगु दु । उच्च रक्तचापया समस्या खनेदयेधुंकाः महरायात अस्पताल भर्ना याःगु खः ।

प्रहरीं थौं मंगलवाः महरायात म्याद थपया नितिं अदालतय् यंकेगु तयारी याःगु दु ।

महराया डीएनए परीक्षणया तयारी

घटनाया अनुसन्धानय् खटेजूगु येँ प्रहरी परिसर टेकु व महानगरीय प्रहरी वृत्त बानेश्वरं आरोपया पुष्ट्याइँ यायेगु झ्वलय् डीएनए परीक्षण यायेगु तयारी याःगु खः ।

अपराधस्थल धाःगु छेँपाखें बरामद जूगु तज्याःगु सुलचं(चस्मा), लाकांया जिब्री लगायतया हलंज्वलं महराया खः कि मखु धैगु प्रमाणित यायेत डीएनए जाँच यायेत्यंगु स्रोतं धाःगु दु । प्रहरीं महराया निवासपाखें नं छुं लाकां व मेमेगु हलंज्वलं नं बरामद यायेधुंकूगु स्रोतं धाःगु दु ।

संसद सचिवालय दुने हे ज्या याइम्ह पीडित मिसां १३ असोजय् घटना सार्वजनिक यानाः ब्यूगु भिडियो अन्तर्वार्ताय् उगु सबुत क्यंगु खः । थः सभामुखपाखें बलात्कृत जूगु धासें प्रहरी कन्ट्रोल १०० स फोन याःगु कन्हय् कुन्हु भिडियो सार्वजनिक जुइधुंकाः जक प्रहरीं उगु सबुत मुंकूगु खः । अनुसन्धानय् दुथ्याःम्ह छम्ह अधिकृतं धाःगु दु, “चस्मा वा लाकांया जिब्रीइ अभियुक्तया चःति दयेफुगु जूगुलिं डीएनए परीक्षण यानाः स्वयेत्यनागु खः ।”

अधिकृतपिनिगु कथं जबरजस्ती करणी उद्योगया कसूर पुष्टि जुइत निगू विषय दकले अप्वः महत्वपूर्ण जुइ । न्हापांगु, अभियुक्त घटनास्थलय् थ्यंकूगु खनेदयेमाः ।

थुगु विषयस प्रहरीं सीसी टीभी फुटेजया विश्लेषणपाखें पुष्टि यायेधुंकूगु दु । अनुसन्धान अधिकृतया कथं महराया गाडी १२ असोजय् सनिलया ७ ता ईपाखे मिसाया छेँ लिक्क दिकातःगु खनेदु । अय्सां, सीसी टीभी फुटेज स्पष्ट धाःसा मजू ।

अनं ८ः४५ ता इलय् महरा च्वनावःगु गाडी लिहाँ वंगु खनेदु । वदथुया निघौया अवधिइ मिसा व महरा जक कोठा दुने दूगु प्रहरीया धापू दु । प्रहरीइ खबर जुइधुंकाः वंगु बानेश्वर वृत्तया पुचलं छेँया च्वय् च्वंगु तलाय् बृद्ध मिसायात नं नापलाःगु खः । तर, लिबाक्क थ्यंगु हुनिं महरा पिहाँ वनेधुंकूगु धाःगु दु ।

महरालिसें वंम्ह अंगरक्षकं नं महरा घटनास्थलय् थ्यंगु अनौपचारिक बयान बिइधुंकूगु दु । सरकारी वकिल न्ह्यःने औपचारिक बयान जुइ ।

महरायात लाःगु अभियोग पुष्टि यायेत अनुसन्धान अधिकृत न्ह्यःने मेगु जिम्मेवारी शारीरिक आक्रमण सीदइगु सबुत मुंकेगु नं खः । आपालं बलात्कार कुतःया घटनाय् पीडितया लँ गुइगु खनेदु । तर, थ्व घटनाय् अथे मजू । बर निगुलिं पक्षयात घाःपाः जूगु खनेदूगु अनुसन्धान अधिकृतं धाःगु दु । प्रहरीं अस्पतालय् याकूगु स्वास्थ्य परीक्षणं नं पीडितया म्हगलय् घाःपाः जूगु क्यनेधुंकूगु दु ।

अनुसन्धानय् दुथ्याःम्ह अधिकृतं धाःगु दु, ‘थुज्वःगु अवस्थाय् कि त मेमेपिं मनुत नं दुने दुहाँ वंगु खुलस्त यायेमाः । मखुसा महराया हे हुनिं घाःपाः जूगु पुष्टि जुइ ।’

Categorized in राजनीति