chetrapa55

बरिष्ठ सिने पत्रकार असंबरेयात ‘म्यूजिक खबर संगीत पत्रकारिता सम्मान’ लःल्हाइगु

नेवा: अनलाइन न्युज – ललेन्द्र शाक्य | २०७६ मङ्सिर १८, बुधबार १४:३६:३८

वंगु च्यादँ न्ह्यःनिसें मद्दिक्क ग्वसाः ग्वयाः वयाच्वंगु म्यूजिक खबर म्यूजिक अवार्डया च्याक्वःगु संस्करण थ्वहे मंसीर २० गते येँया प्रज्ञाभवन कमलादीइ जुइगु जूगु दु ।

‘सांस्कृतिक पर्यटन–कलासंस्कृतिया प्रबर्द्धन’ धैगु मु आज्जुया लिसें आन्तरिक रुपं सांस्कृतिक पर्यटन अप्वयेकेत थुगु अवार्डं विशेष भूमिका म्हितीगु ग्वसाः खलकं आज्जु काःगु दु ।

शुभकामना मिडिया सोलुशनया ग्वसालय् जुइत्यंगु उगु अवार्डयात थ्वसिबें न्ह्यः म्यूजिक खबर डटकमं ग्वसाः ग्वयाः वयाच्वंगु खः । थुगु दँनिसें शुभकामना मिडिया सोलुशन (एस के. मिडियां) सकतां व्यवस्थापनलिसें ग्वसाः ग्वइगु जूगु दु ।

थीथी ४० गू विधाय् ग्वसाः ग्वइगु उगु अवार्ड म्ये व संगीत ख्यलय् विशेष च्यूताःया विषय जुयाच्वंगु दु । थुगु अवार्डय् राष्ट्रिय भावया म्ये, संकिपा, आधुनिक, लोकदोहोरी, लोकम्ये, पप, गजल, कल्चरल म्येत दुथ्याकूगु दु ।

अवार्डय् म्येहालामि, म्येच्वमि, लय् चिनामि, संगीत संयोजक, ध्वनि सम्पादक, भिडियो निर्देशक, क्यामेरा पर्सन, सम्पादक, उत्कृष्ट म्ये लिसेंया थीथी विधाय् अवार्ड ग्वसाः ग्वइगु जूगु दु ।

थ्वहे झ्वलय् नेवाः अनलाईनन्यूजया संरक्षकलिसें नेपालभाषाया न्हापांम्ह सिने पत्रकार व निर्देशक विजयरत्न असंबरेयात ‘संगीत पत्रकारिता पुरस्कार’ लःल्हाइगु जूगु दु ।

बरिष्ठ सिने पत्रकार विजयरत्न तुलाधरं २०३९ सालय् गोरखापत्रय् आर्टिकल पिदने धुंकाः पत्रकारिताय् पलाः न्ह्याकादीगु खः । २०४२ सालय् संवाददाताया रुपं कामना मासिकय् दुहाँ वनाः सिने पत्रकारितायात स्थापित यासें पत्रकारिता ख्यल् मद्दिक्क आःतक नं सक्रिय जुयाः वयाच्वनादीम्ह बरिष्ठ सिने पत्रकार खः विजयरत्न तुलाधर असंबरे ।

भाजु असंबरें सम्पादन यानादीगु पत्रिकात कलाकार आवाज, रोहिणी, रोशनी, स्टारडम लिसेंया आपालं दु । नेपालभाषाया पत्रिकाय् तकं सक्रिय रुपं पलाः न्ह्याकाः सिने पत्रकारिता ख्यलय् जीवन समर्पण यानाः वयाच्वनादीम्ह बरिष्ठ सिने पत्रकार विजयरत्न तुलाधरयात संसार क्रियसन्सया ग्वसालय् जुइत्यंगु नेपालभाषा स्टार म्यूजिक भिडियो अवार्डस् २०१९ य् संसार सप्तरंगी अवार्डपाखें नं सम्मानित याइगु जूगु दु ।

च्याक्वःगु प्रभु पे म्यूजिक खबर म्यूजिक अवार्ड २०७६ या लसताय् बरिष्ठ सिने पत्रकार विजयरत्न तुलाधर असंबरेयात म्यूजिक खबर संगीत पत्रकारिता सम्मान लःल्हायेत्यंगु खः ।

अथेहे, उगु ज्याझ्वलय् बरिष्ठ म्येच्वमि किरण खरेलयात दीर्घ साधना सम्मानपाखें सम्मानित याइगु जूगु दु । थ्वहे ज्याझ्वलय् नांजाःम्ह संगीतकार आलोक श्रीयात व नांजाःम्ह म्येहालामि सिन्धु मल्लयात  दशकया स्रष्टा सम्मान, म्येच्वमि ज्ञानेन्द्र गदालयात डायस्पोरा संगीत सम्मान, म्येहालामि नवीन पौडेलयात युवा प्रतिभा संगीत सम्मान, म्येहालामि क्रिष्टिना श्रेष्ठयात बाल प्रतिभा प्रोत्साहन सम्मान, पत्रकार मणिराज गौतमयात मोफसल पत्रकारिता सम्मानपाखें सम्मानित याइगु जूगु दु ।

Categorized in कला