chetrapa55

फौजदारी अभियोग फयाच्वंम्ह गुरुङयात मन्त्री जुइत ‘छूट’

नेवा: अनलाइन न्युज | २०७६ मङ्सिर ६, शुक्रबार १६:३२:२२

बुधवा: सनिल प्रधानमन्त्री केपी शर्मा ओलीं मन्त्रिमण्डल पुनर्गठन याःगु दु । गुकी ट म्ह मन्त्री व ३ म्ह राज्यमन्त्री यानाः ९ म्ह न्हूगु ख्वाः वल । उलि हे ल्याखय् मन्त्री व राज्यमन्त्री बिदाई जुल ।

कार्यसम्पादनय् कमजोरलिसें बांलाःगु ज्या यायेगुलि पलाः न्ह्याकाच्वंपिं ख्वाःयात तकं बिदाई याःगु धासें प्रधानमन्त्री ओलीया आलोचना जुयाच्वंगु दु । थुज्वःगु आलोचना स्वयं नेकपाया हे नेता कार्यकर्तापिन्सं अप्वः यानाच्वंगु दु ।

बुधवाः मन्त्रिमण्डल पुनर्गठनय् लाःपिं ९ म्ह मन्त्रीपिंमध्ये छम्ह न्हूम्ह ख्वाः खः मिसा, बालबालिका व ज्येष्ठ नागरिकमन्त्री पार्वत गुरुङ ।

निदँ न्ह्यःया प्रतिनिधिसभा निर्वाचनय् तत्कालीन एमालेया नायः ओली दकले अप्वः भोट काःम्ह सांसद जूबलय् गुरङं दकले तःधंगु मतान्तरय् चुनाव त्याकेगु सौभाग्य कायेखंगु खः ।

गुरुङ ५५ हजार ४५७ मत हयाः प्रतिनिधिसभा दुजः निर्वाचित जूबलय् वया निकटतम प्रतिस्पर्धी नेपाली कांग्रेसया रुद्रबहादुर खड्कां २४ हजार ८१३ मत जक काःगु खः । निर्वाचनय् सर्वाधिक मत व मतान्तरय् रेकर्ड दयेकुम्ह ओली व गुरुङ निदँलिपा छगू हे क्याबिनेटय् नापलाःगु दु ।

तर गुरुङं मन्त्रीया सपथग्रहण व पदबहाली यायेधुंकूसां नं गुरुङविरुद्ध मनू स्याःगु अभियोगय् येँ जिल्ला अदालतय् फौजदारी मुद्दा विचाराधीन जुयाच्वंगुलिं कानूनी रुपं हे थुकिं न्ह्यसः ब्वलंकूगु दु ।

मन्त्री नियुक्त जुइगु लच्छि न्ह्यः कार्तिक ३ गते जक गुरुङ कर्तव्य ज्यान उद्योग अन्तर्गत येँ जिल्ला अदालतं साधारण तारेखय् पिहाँ वःगु खः ।

तर, मुद्दाया लिपांगु इलय् खँ क्वःमजिनिसां सांसद गुरुङयात मन्त्री जुइत लँपु मपंगु खः ।

गुरुङविरुद्ध वंगु २९ बैशाख २०७६ स पार्टीया हे कार्यकर्ता वीरध्वज खड्कां ‘थःत व्यक्ति परिचालन यानाः ज्यान मार्ने उद्योग’ याःगु द्वपनय् महानगरीय प्रहरी परिसर येँय् जाहेरी ब्यूगु खः ।

खड्काया जाहेरीया आधारय् येँ जिल्ला अदालतं पक्राउ पूर्जी जारी यायेधुंकाः कार्तिक ३ गते गुरुङ अदालतय् हाजिर जूगु खः । वहे दिं अदालतया न्यायाधीश पूर्णेश्वरकुमार उपाध्यायया इजलासं वयात साधारण तारेखय् रिहा यायेत आदेश ब्यूगु खः ।

२०७४ सालया स्थानीय निकायया निर्वाचनय् दोलखाया गौरीशंकर गाउँपालिका–१ य् तत्कालीन नेकपा एमालेपाखें वडा दुजः उम्मेदवार जूम्ह कुलबहादुर तामाङया हत्या जूगु खः ।

तामाङया हत्यालिपा सांसद गुरुङ विवादय् लाइगु स्वभाविक खः । वहे झ्वलय् तत्कालीन माओवादीया नेता देवी खड्का, विशाल खड्का लिसें ३९ म्हविरुद्ध मुद्दा दर्ता जूगु खः । माओवादीया छम्ह कार्यकर्तां थःम्हं गुरङया निर्देशनय् स्यायेगु आज्जुं कुटपिट याःगु धासें जाहेरी ब्यूगु खः ।

मुद्दा विचाराधीन जुयाच्वंगु अवस्थाय् गुरुङया मुद्दाया मेगु पेशी मंसीर २४ गतेयात क्वःछ्यूगु दु । पेशी मंसीर २४ गतेयात क्वःछ्यूगु जुयाः गुरुङ सरकारी गाडीइ ध्वाँय् ब्वयेकाः अदालत वनीगु जूगु दु ।

अदालतया कथं उगु दिं पेशीइ साक्षीपिनिगु बकपत्र जुइ । जाहेरीकर्ता खड्कायात मरणसन्न जुइगु कथं कुटपिट याःगु खंपिं व्यक्तिपिन्त प्रहरीं साक्षी दयेकूगु खः ।

२०७४ या स्थानीय निकायया निर्वाचनय् दोलखाया गौरी शंकर गाउँपालिका–१ य् तत्कालीन नेकपा एमालेपाखे. वडा दुजः उम्मेदवार जूम्ह कुलबहादुर तामाङया हत्या जुगु खः । तामाङया हत्या लिपा सांसद गुरुङ विवादय् सालाकाइगु स्वभाविक खः ।

वहे झ्वलय् तत्कालीन माओवादीया नेता देवी खड्का, विशाल खड्का लिसें ३९ म्हविरुद्ध मुद्दा दर्ता जुल । माओवादयिा छम्ह कार्यकता. थःत गुरुङया निर्देशनय् स्यायेगु आज्जुं कुटपिट याःगु धासे. जाहेरी ब्यूगु खः ।

कानूनया जनकारपिनिगु कथ. सुं व्यक्ति गिरफ्तारीइ लायेवं वा थुनाय् च्वनेवं दोषी धाये मिलेमजू । जब अदालतं फैसला याइ, उबले जक इपिं अपराधी वा दोषी करार जुइगु खः ।

थुगु अर्थय् कृष्णबहादुर महरा, मोहम्मद आफताब आलम व पार्वत गुरुङय् कानूनी दृष्टिकोणं भिन्नता खनेमदूगु कानूनविदपिनिगु धापू दु ।

फरक थुलि खः कि जयान मुद्दाया हे द्वपनय् आलम पुपृक्षया नितिं थुनाय् दुसा योन दुर्व्यवहारया द्वपनय् महरा नं थुनाय् दु ।

फौजदारी अभियोगय् मुद्दा न्ह्यानाः साधारण तारेखय् त्वःतूगु भरय् हे सांसद गुरुङ धाःसा निर्दोष थें हे कायेधुंकाः मेमेपिं थुज्वःगु हे मुद्दा फयाच्वंपिनिगु हकय् छु जुइ ? गुरुङ मन्त्री जुइधुंकाः थ्व न्ह्यसः नं ब्वलंगु दु ।

लिसें फौजदारी अभियोग फयाच्वंम्ह सांसदयात सिरपाः कथं मन्त्री दयेकेगु गुलि न्यायोचित ठहर जुइ धैगु तकं न्ह्यसः कानूनविद्पिन्सं ल्ह्वनाहःगु दु ।

कानूनविद् भीमार्जुन आचार्यं धयादी, “आलम, महरा व गुरुङ प्रकरणय् कानूनी दृष्टिकोण स्वयेबलय् छगू हे खः, छु. पाःगु मदु । कानून व संविधान कथं पार्वत गुरुङयात मन्त्री दयेके पायछि मजू ।”

आचार्यया कथं कानूनं तारेख, धरौटी वा पुर्पक्षया नितिं थुनाय् वन धैगु खँपाखें छुं फरक जुइमखु । फौजदारी मुद्दा अदालतय् विचाराधीन दु धैगु हे खः । अदालतय् मुद्दा विचाराधीन दूगु अवस्थाय् सरकारी कोषपाखें तलब नयेगु व सुविधा कायेगु सुं नं छुं पदय् दु धाःसां नं व निलम्बन जुइ ।

नेपाःया संविधानय् फौजदारी मुद्दा दायर जुइखतं पद निलम्बनय् लाइगु व सुविधा नं खोसेजुइ । व, लिपा कसूर प्रमाणित जूसा उगु पद नं खारेज जुइगु कानूनय् व्यवस्था यानातःगु दु ।

Categorized in राजनीति