telecom 18 kartik 2076

फेसबुकया आज्जु समाचारया स्रोत जुइगु

नेवा: अनलाइन न्युज | २०७६ श्रावण २९, बुधबार १७:१५:०४

तःधंगु संचार माध्यमलिसे सम्झोता याइगु

समाचार हलंज्वलंत हाकनं प्रकाशित यायेगु लाइसेन्स कायेगु नितिं सोसल मिडिया साइट फेसबुकं विश्वया चर्चित समाचार एजेन्सीलिसे सम्झौता यायेगु तयारी याःगु दु ।

वालस्ट्रिट जर्नलया कथं फेसबुकं थुज्वःगु प्रकाशक व संचार माध्यमलिसे इमिगु समाचार फेसबुकय् हाकनं प्रकाशित यायेगु सम्झौताया नितिं दशौं लख डलर पुलेमाः ।

न्हापांगु चरणय् फेसबुकं एबीसी न्यूजया लिसें ब्लुम्बर्ग, डाउ जोन्स व वाशिङटन पोष्टलिसे खँ ल्हानाच्वंगु दु ।

फेसबुकं थःगु साइटय् समाचारया खण्ड थप यायेगु तयारी याःगु दु व वहे खण्डय् उगु मिडियातय्गु समाचारयात हाकनं प्रकाशित याइ । अय्सां, फेसबुकय् संचार माध्यमया समाचारया शीर्षक वा संक्षिप्त ब्व जक खनेदइ व मुक्कं समाचार ब्वनेगु निति. फेसबुकय् हे क्लीक यानाः सम्बन्धित मिडियाया वेबसाइटय् थ्यनी ।

फेसबुकं समाचारया साझेदारी सम्झौताया नितिं प्रकाशकलिसे ताःईतकया सम्झौताया प्रतिबद्धता प्वंकाच्वंगु दु ।

लुमंकेबहःजू, समाचार एजेन्सीलिसे फेसबुकया स्वापू विरोधाभाषपूर्ण जुयाः वयाच्वंगु दु । फेसबुक व गुगलथें जाःगु कम्पनीतसें डिजिटल विज्ञापन बजारय् कब्जा याःगु व उकिं संचार उद्योगयात नकारात्मक लिच्वः लाकुगु दु । अमेरिकाय् जक न. अखबार, म्यागेजिन व डिजिटल मिडिया कम्पनीपाखें फेसबुक. तःधंगु परिमाणय् अनलाइन विज्ञापन खोसेयायेत सफल जूगु दु ।

अय्सां, लिपांगु ई मिडियातसें तकं फेसबुकपाखें हे तःधंगु ल्याःया पाठक व दर्शकपिं थःपिनिपाखे सालेगु कुतः यानाच्वंगु दु ।

फेसबुकय् दूगु करोडौं छ्यलाबुला याइपिन्त थःपिंलिसे स्वायेगु नितिं फेसबुकयात माध्यम दयेकीगु मिडिया एजेन्सीया ल्याः नं अप्वयाच्वंगु दु । थुज्वःगुलि फेसबुकं याःगु सहकार्यया प्रस्ताव विश्वया चर्चित संचार एजेन्सीतसें सहज रुपं स्वीकार याइगु धाःगु दु ।

एजेन्सी

Categorized in अन्तर्राष्ट्रिय