ad 2076 5 18

फेसबुकं धोखा जुइफु

नेवा: अनलाइन न्युज | २०७२ फाल्गुण २९, शनिबार ११:५८:३३

अतिकं लोकंह्वानाच्वंगु सामाजिक नेटवर्किङ फेसबुकं छितः छुं नं इलय् बदनाम यानाबी फु । थुकि छितः बांमलाक्क धोखा नं जुइफु । थुकिं फेसबुक प्रयोगकर्तापिं सचेत जुइमाःगु खनेदु । होशियार जुयादिसँ छितः म्हमस्यूपिं वा म्हस्यूपिं सुं नं फेशबुकया पासापिसं स्यंकेत स्वयाच्वंगु जकं मदुला ?
‘फेसबुकं’ तापाना वने धुंकूपिं यक्व पासापिन्त नाप लाका ब्यूगु दु । पासापिनि दथुइ पुचः दयेकाः मंकाः सन्देश प्रवाह यायेगु निसें कयाः थीथी ख“ कालबिल नं याये खनाच्वंगु दु । न्हून्हूपिं पासापिं दयेकाः खँल्हाबल्हा यायेगु नापं न्हून्हूगु गतिविधि नं सयेकेसीके नं दयाच्वंगु दु । अले थःके दुगु यक्व खँत पासापिनि दथुइ ब्वये नं खनाच्वंगु दु । थुकथं यक्व सकारात्मक खँ दयाः नं फेसबुक दुने नं मचायेक आपराधिक खँत खनेदयावःगु दु । थुकि फुक्क सचेत जुइमाःगु खनेदु ।


छुं न्हि न्ह्यः संकिपाकःमि, खेलकुद परिषदया  पुलाम्ह सदस्य सचिव युवराज लामाया फेसबुकय् म्हमस्यूपिसं यौन समागमरत किपाः अपलोड याना तल हँ । थुकिं छगू ई ला पासापिनि दथुइ तःधंगु चर्चा नं जुल हँ । लिपा पासापिनि फोन वयेवं वय्कलं उगु किपाःत थःगु पानां चीकादिल हँ ।

 

फेसबुकया यक्व केसत नं वयाच्वंगु दु । प्रहरी नापं फेसबुकया वालय् तयातःगु किपाःयात कयाः उजुरी तः वयेगु व कारवाही यायेगु ज्या नापं जुयाच्वंगु दु । छुं न्हि न्ह्यः तिनि नुवाकोटया छम्ह मिसाया फेसबुकया वालय् वया हे यज्जुं अश्लील किपाःत अपलोड यानाः तसकं मछिंका ब्यूगु खः । निला न्ह्यःतक यज्जुनाप इहिपा यानाः न्ह्यइपुगु जीवन हनेगु म्हगस खनाच्वंम्ह उम्ह मय्जुयात थुकथं सशस्त्र प्रहरीया सिपाही यज्जुं धोखा बियाः थथे अश्लील किपात अपलोड यानाब्यूगु खः ।


थः यज्जुं बेमान यानाः थःगु फेसबुकय् थुकथं अश्लील किपाः अपलोड यात धकाः व मिसां प्रहरी उजुरी बिल । लिपा प्रहरीं वया यज्जु प्रहरी जवानयात ज्वंगु खः । सी दुकथं इपिं कलाःभात थें च्वने नं धुंकूगु जुयाच्वन । अले विश्वासं पासवर्ड कालबिल याःगु जुयाच्वन । लिपा मिजंम्हेस्यां थः यज्जुया पासवर्ड हे हिलाः थुकथं अश्लील किपाः अपलोड याःगु जुयाच्वन । मिजं नं थः यज्जुं त्वःतेत्यंगुलिं थुकथं म्वाःमदुगु खँ अपलोड याःगु खँ प्रहरीं जानकारी ब्यूगु दु ।
फेसबुक थौंकन्हय् उप्वः धइथें ल्याय्म्ह ल्यासेपिनि म्हाइपु छ्यायेगु नेटवर्क थें नं जुयाच्वंगु दु । उकिं थुगु वर्गया फेसबुकपाखें तःधंगु आकर्षण दु । थुकी आः छेँजःपिसं नं स्वयेमाःगु लँ क्यनेमाःगु अवस्था पिहाँवःगु दु ।