nepal lifef 2076 8 8

फेसबुकं आः आतंकवादीतय्त म्हसीकीगु

२०७३ फाल्गुण ७, शनिबार १३:३१:३७

सोसल नेटवर्किङ साइट फेसबुकं छगू थुज्वःगु सफ्टवेयरया निर्माण यायेत्यंगु दु गुकिं फेसबुकय् पिदनीगु हलंज्वलंतय्गु जाँच याये फइ । फेसबुकया संस्थापक मार्क जुकरवर्गं छगू खुल्ला पौपाखें थुज्वःगु खुलासा याःगु खः ।

वय्कःया कथं थुज्वःगु एल्गोरिदम अर्थात् गणितीय प्रोग्राम दयेकेत्यंगु दु गुकिं फेसबुक पोष्टय् आतंकवाद, हिंसा, दुर्व्यवहार, घृणा आदि थेंजाःगु खँयात ज्वनेफइ । थुकिया लिसें उगु सफ्टवयेर आत्महत्या पनेत तकं ग्वाहालि यायेफइग्ु दाबी याःगु दु ।

५५०० पेजया थःगु पतिइ जकरवर्गं फेसबुकया भविष्यया बारे चर्चा यासें विद्यमान अवस्थाय् फेसबुकय् न्हिथं पिदनीगु अरबौं पोष्ट व मेसेजया जाँच यायेगु असम्भव थें जूगु धाःगु दु ।

पतिइ जुकरवर्गं धयातःगु दु, “आः छगू थुज्वःगु प्रणाली दयेकेगु कुतः जुयाच्वंगु दु गुकिं टेक्स्ट ब्वने फइ व किपाः व भिडियो स्वये फइ । थुइके फइ व गनं खतरनाक घटना ला जुइत्यंगु मदुला ? धैगु खँ सीके फइ ।”

जुकरवर्गं थुज्वःगु सफ्टवेयर निर्माणया योजना आः सुरुवाती अवस्थाय् दूगु प्रष्ट याःगु दु । वय्कःया कथं फेसबुकं आः आर्टिफिसियल इन्टेलिजेन्सया थुज्वःगु छ्यलाबुलाया बारे विचाः यानाच्वंगु दु गुकिं आतंकवादलिसे स्वानाच्वंगु खबर व आतंकवादया प्रचारप्रसार दथुया अन्तर म्हसीके फइ ।

सन् २०१४ स लण्डनय् छम्ह बेलायती सैनिकया हत्या याःम्ह हत्यारामध्येया छम्हेसित घटनाया महिनौं न्ह्यः हे थःगु योजनाया जानकारी फेसबुक पाखें बिइधुंकूगु तथ्य सार्वजनिक जुइधुंकाः फेसबुकया आलोचना जूगु खः ।

आतंकवादी म्हसीकीगु फेसबुकया योजनायात साइबर सुरक्षाया क्षेत्रय् ज्या याइगु संस्थातसें लसकुस याःगु दु । फेसबुकं थःगु साइटय् आतंककारीं छ्यः पाःगु भिडियोत नं छुं ख्याच्वः सन्देश विना प्रकाशित यायेगु अनुमति ब्यूगु धासें फेसबुकया आलोचना जुइगु जुयाच्वंगु दु ।