ad 2076 5 18

फिल्म मेकर योवन शाक्यया स्वंगू सर्ट मुभि नेवाः यूट्युब च्यानलपाखें

नेवा: अनलाइन न्युज – ललेन्द्र शाक्य | २०७६ भाद्र २२, आइतबार १६:११:३१

आः जुइत्यंगु सर्ट मुभि (चिहाः संकिपा)या नितिं योवन शाक्यं निर्माण यानादीगु स्वंगू सर्ट मुभि नेवाः यूट्युब च्यानलपाखें दुथ्याइगु जूगु दु ।

युवा जोश, न्हूगु सोंच व गुणस्तरीयतायात कायम यायेगु आज्जु ज्वनाः थुगु संकिपा ख्यलय् पलाः न्ह्याकाः वयाच्वनादीम्ह बहुप्रतिभाशाली कलाकःमि योवन शाक्यं आः जुइगु चिहाः संकिपा (सर्ट मुभि) कासाय् थःम्हं निर्देशन व सम्पादन यानादीगु स्वंगू संकिपा नेवाः यूट्युब च्यानलपाखें ब्वति कायेत्यंगु खः ।

भाजु योवन शाक्यं संकिपा ख्यलय् नवोदित बाखं च्वमि किपूया राज महर्जनं च्वयादीगु सर्ट मुभि ‘ह्याउँगु हि’, नेपालभाषा उपन्यास ख्यलय् दकले न्हापांम्ह मिसा उपन्यास च्वमि शशीकला मानन्धरया च्वसां पिज्वःगु सर्ट मुभि ‘ध्वः छध्वः रेखां क्यूगु’ व राज महर्जनं हे च्वयादीगु सर्ट मुभि ‘आस्था’ यानाः स्वंगू चिहाः संकिपां ज्वनाः उगु कासाय् ब्वति कायेत्यंगु दु ।

थः केवल फिल्म मेकर जक जूगु व फिल्मयात क्वान्टिटी मखु कि क्वालिटी मिइमाःगु व न्हूगु सोंच न्हूगु विचाः संकिपापाखें स्वकुमिपिनिगु न्ह्यःने यंकेमाःगु खँ कनादिसें निर्देशक सम्पादक योवन शाक्यं कासाया नितिं स्वंगुलिं सर्टमूभिया सम्पादनया ज्या क्वचाये हे त्यंगु जानकारी बियादीगु दु ।

भाजु शाक्यं आः जुइगु सर्ट मुभि कासां धात्थेंयापिं मुभि मेकरपिनिगु उदय जुइगु विचाः नं प्वंकादीगु दुसा संकिपा च्वमि राज महर्जनं नं आः जुइगु सर्ट मुभि कासा संकिपा ख्यःया समुन्द्र मन्थन हे जुयाः स्यल्लाःपिं फिल्म मेकरपिनिगु जीत जुयाः संकिपा ख्यलय् हिउपाः हइगु खँय् धुक्क जुयागु विचाः प्वंकादीगु दु ।

फिल्म मेकर योवन शाक्यं जानकारी बियादी कथं नवोदित बाखंच्वमि राज महर्जनं च्वयादीगु ‘ह्याउँगु हि’ थित्यः मत्यःगुु खँय् तक्यनाच्वंगु समाजय् जातभातया विभेदयात मू बाखं कथं न्ह्यब्वयातःगु दुसा राज महर्जनं हे च्वयादीगु संकिपा ‘आस्था’ धार्मिक ख्यलय् जुइगु गतिविधियात कयाः जनतापिन्त सचेत यायेगु नितिं दयेकातःगु चिहाः संकिपाः खः । अथेहे, मिसा उपन्यास च्वमि शशीकला मानन्धरं च्वयादीगु ‘ध्वः छध्वं रेखां क्यूगु’ चिहाः संकिपा छम्ह विधवा मिसाया बेदना, उत्सुकता व चाहनाया बाखंयात कःघानाः दयेकातःगु दु ।

‘ह्याउँगु हि’ चिहाः संकिपाय् सुरज व्यञ्जनकार, सरस्वती मानन्धर, रोजिना सुवाल व महेन्द्र प्रजापतिपिनिगु मू भूमिका दुसा ‘ध्वः छध्वः रेखां क्यूगु’ संकिपाय् सरीता बज्राचार्यलिसें प्रबोध कसाः, प्रेमा शाक्य, सुरेन्द्र महर्जन तापाख्यःमि, रणेन्द्र महर्जनलिसें पूर्णमान महर्जन, पूजा महर्जन व धर्मदेव महर्जनया मू भूमिका दु । अथेहे, ‘आस्था’ चिहाः संकिपाय् नं प्रतिभावान् कलाकारपिनिगु अभिनय दुथ्याःगु जानकारी फिल्म मेकर शाक्यं कनादीगु दु ।

थौंकन्हय् फिल्म मेकर योवन शाक्यं निर्माण यानाच्वंगु स्वंगू चिहाः संकिपां नेपालभाषा संकिपा ख्यलय् आपालं हिउपाः हइगु खँय् निगूमत मदु, छाय् धाःसा स्वंगुलिं संकिपाय् स्वंगू हे धारं क्यामेरा म्हितागु व एडिटिङ्गया झ्वलय् कलर क्रियसननिसें कयाः थीथी पक्षय् न्हून्हूगु क्रियसनपाखें ज्या यानागु खँ कनादिसें फिल्म मेकर योवन शाक्यं स्वंगुलिं चिहाः संकिपाया बाखंया धार नं ब्यागलं ब्यागलं जूगुलिं नेवाः संकिपा ख्यलय् गुणस्तरीयता व धात्थेंया चिहाः संकिपा धैगु छु खः धैगु क्यनाः हिउपाः हयेगु विचालं हे पलाः न्ह्याकाः च्वनागु खँ नं कनादीगु दु ।

उकिं धाये ज्याछिं कि फिल्म मेकर योवन शाक्यया पिदनीगु व चिहाः संकिपा कासाय् दुथ्याइगु स्वंगू चिहाः संकिपा नेपालभाषा संकिपा ख्यःया हिउपाःया सूत्रधार जुइ धकाः ।

फिल्म मेकर योवन शाक्य नेवाः यूट्युब च्यानलया नितिं चिहाः संकिपा निर्माण यानाः वयाच्वनादीम्ह खः । वय्कलं थौंतकया दुने ७ गुलिं मल्याक चिहाः संकिपा दयेके धुंकूगु दु ।

थन क्लीक यानाः ‘ह्याउँगु हि’या ट्रेजर स्वयादिसँ

थन क्लीक यानाः ‘ध्वः छध्वः रेखां क्यूगु’या ट्रेजर स्वयादिसँ

थन क्लीक यानाः ‘आस्था’या ट्रेजर स्वयादिसँ

Categorized in कला